Статагентлик ҳисоботларини энергетикларга маъқуллатиб, кейин ишлатиш керакми? Энергетика вазирлиги статагентлик ҳисоботларига асосланган ҳолда электр энергияси ва газ қазиб олиш қисқаргани ҳақида тарқатилган хабарларга эътироз билан чиқмоқда. Буям етмагандек, электр ва газга оид маълумотлар тарқатганда "Энергетика вазирлиги Ахборот хизмати орқали аниқлик киритиб олиш" сўралган. Демак, Энергетика вазирлигига кўра , май ойида 6,1 млрд.кВт.соат электр энергияси ишлаб чиқарилган. Расмий статистикага кўра эса 3,2 млрд.кВт.соат. Энергетикларга кўра, ишлаб чиқариш эмас, истеъмол камайган, ўзбекистонликларнинг истеъмоли камайганини электрнинг йўқлиги ёки узилишлар эмас, тежашга ўтгани билан изоҳланмоқда. Ортиқча ишлаб чиқарилган электр энергияси четга экспорт қилинмоқда экан (май ойида 11,6 млн.долларлик электр энергияси экспорт қилинган, апрелда эса 14,5 млн.долларлик, яъни экспорт ошмаган, камайган). Статистика ва энергетиклар рақамлари ўртасидаги улкан фарқнинг сабаби нимага оид экани айтилмаган (ҳисобот даврийлиги, методология), бундай ҳалинчакларнинг юз бериши биринчи марта эмас. Энергетиклар ҳисобига кўра, май ойида 3 554,8 млн.куб газ қазиб олинган. Расмий статистика бўйича эса 3 524,6 млн.куб. Газ қазиб олиш қисқариши сабабларини энергетиклар Қандим заводи ва Жарқудуқ комплексида таъмирлаш ишлари кетаётгани билан тушунтиришган. Газ қазиб олиш 3 йилдан бери муттасил қисқариб бораётгани сабабларига эса тўхталинмаган. Ахборот хизмати жаноб Мирзамаҳмудовнинг газ қазиб олишда ўсиш бўлиши айтилган ўтган йилги баёнотини эсламаган. Табиийки, савол туғилади, аҳволи тобора оғирлашиб бораётган энергетикадаги реалликлардан хабар топиш учун кимга ишониш керак? Ўзбек статистикасигами? Энергетикларга? Қайси бири ишончсизроқ? Ўзи умуман, свет йўқлиги ё ўчаётгани ҳақида энергетикларнинг ўзидан аниқлик киритмасдан ҳам ёзса бўладими? Ё бу борадаям энергетиклар рухсати керакми?