Ўтган эпохада, 2003-2016 йилларда ҳар 2-3 йилда бир фермерларнинг ери тортиб олиниб бошқасига бериларди. Бунинг номи ҳужжатларда мақбуллаштириш дея таснифланган. Турли мажлис ва оғзаки топшириқларда ҳеч бир қонун ва қоидаларга тўғри келмайдиган ерни тортиб олиш, қайта тақсимлаш, бошқасига бериш жараёнларини Ойболта деб аташарди. Ерни тортиб олишга ҳамма вақт баҳоналар топилган. Баъзида фермерлар ер майдонларини кичрайтириш баҳона бўлган бўлса, кейинги сафар ер майдонларини катталаштириш ҳам сабаб дея кўрсатилган. Натижада йиллар давомида фермерларнинг ишига, ерига кўнгли совуди. Бегоналашди, айримлари, йиллар давомида меҳнатига қарамай, бўйнига қайтариб бўлмас даражада қарзлар илинди. Бугун изғиринли Россияда мардикорлик қилаётганларнинг анчагина қисми собиқ фермерлардир. Шу даражага етдики қайсидир ташкилот ишчилари келиб фермернинг ерига чигит экиб берадиган, прокуратура келиб ўғит сочадиган, мактаб ўқитувчилари чиқиб ягона қиладиган, ўқувчи ва талабалар эса пахта терадиган, банкирлар ҳисоб-китоб қиладиган бўлишди. Чунки фермер ҳеч ким эмас, у четлатилган бир субъектга айланган. Оқибатда пахта етиштириш бошдан оёқ мажбурий меҳнат билан боғлиқ бўлиб қолди. Ўтган ўн йилликлардаги нотўғри сиёсатнинг меваларини ҳалигача тотимоқдамиз. Ўзбек пахтасига нисбатан бойкотни бекор қилишга бесамара уринишлар эса давом этмоқда. Бугун кластерлар билан юз бераётган экспроприация жараёнлари, уларнинг мулк ҳуқуқи қонунларга чайса қилиб тупуриб қўйиб поймол этилаётгани ўтган даврда фермерлар билан юз берган ойболта операцияларини эслатмаяптими? Наҳотки яна ҳаммаси қофияланган ҳолда такрорланаётган бўлса? Кеча Қашқадарёдаги кластернинг ерини тортиб олишган бўлса, бугун Тошкент вилоятида бошқа бир кластернинг бошига шу кўргулик тушипти. Вилоят ҳокимининг сўзларини қаранг: "туманга қўшимча пул бермаган кластердан – у ким бўлишидан қатъий назар ерни қайтариб олиб қўямиз!". Большевиклардан қаери кам бу ҳокимнинг?