Тошкент ва Самарқандда инфляцион кутилмалар кескин ёмонлашган Ўзбекистоннинг икки асосий маркази Тошкент шаҳри ва Самарқанд вилоятида 2023 йилнинг охирги ойи декабрда аҳоли ва бизнеснинг инфляцион кутилмалари салбий тарафга қараб кескин ошган. Пойтахт Тошкентда аҳолининг инфляцион кутилмалари 15,7%дан 16,5%гача, бизнеснинг кутилмалари эса 13,3%дан 16,2%га кўтарилган. Самарқанд вилоятида эса аҳолининг инфляцион кутилмалари 14,9%дан 15,9%гача ошган бўлса, бизнес вакилларининг кутилмалари янада пессимистроқ кўриниш олган. Самарқандлик тадбиркорлар фикрича, яқин 12 ойда инфляция 15,2%дан 19,2%гача кўтарилади. Бутун Республка бўйича аҳолининг инфляцион кутилмалари 13,6%, бизнесники эса 13,7%ни ташкил этган. Даромадлар қирқимида, 4 млн.сўм ва ундан кўп даромадга эга барча аҳоли қатламларининг инфляцион кутилмалари ёмонлашган. Хусусан, 15 млн.сўм ва ундан кўп даромад олувчиларнинг кутилмалари 15,7%дан 20,7%гача кўтарилган. Соҳалар орасида АТ ва ОАВ ишчилари 16,8%, бизнес йўналишларида соғлиқ сақлаш 16,4%лик инфляцион кутилмалар билан пессимистликда етакчилик қилишмоқда. Инфляция борасида аҳолининг ҳам, бизнеснинг ҳам асосий хавотири валюта курсининг ўзгариши ва ёқилғи энергетика қимматлашуви бўлиб қолмоқда. Шунингдек, сўровларда солиқ юкининг юқорилигидан ташвишланаётганлар улуши бирдан кўтарилиб кетган (5 фоиз бандига).