Имтиёз ва преференциялар учун эмас, рейтинг учун курашадиган вақт келди 1 февралдан бошлаб, Тадбиркорлар учун барқарорлик рейтинги ишга тушади. Рейтинг тизимига ўтишнинг афзалликлари ҳақида жуда кўп гапирилди, ёзилди, муҳокамалар бўлди. Энг асосийси, буёғига энди бизнес ўрни келса-келмаса, имтиёз сўрашни, преференциялар тақдим этишни, турли лобби каналлар орқали ўзларига қулай қоидаларни яратиб олиш учун бемаза ҳаракатларни тўхтатади. Давлат барқарорлик рейтинги орқали тенг имкониятлар қадриятини илгари сурмоқчи. Давлат раҳбари "ушбу рейтинг орқали тадбиркорлар ўртасида қонунларга итоат қилиш, интизомли ва ҳаракатчан бўлишни рағбатлантириш зарур" деб таъкидлагани бежиз эмас. Энди барча учун тенг бўлган, ким аслида кимлигини кўрсатадиган янги ўйин қоидаларини қабул қилиш керак бўлади.