​Асосий ставка пасайтириладими? Эртага Марказий банк асосий ставкани кўриб чиқиш бўйича 2024 йилдаги илк йиғилишини ўтказади. Йиғилиш бир томондан кредит ставкаларини 2-3 фоизга пасайтириш бўйича сиёсий топшириқлар янграган, бошқа бир томондан, инфляцион кутилмалар яхшиланмаётган ва сезилган инфляция ошиб бораётган бир шароитда ўтади. Қўшимчасига, 2023 йил якуни бўйича ҳисоботларда кредитлар бўйича ўртача ставкаларнинг 43 ой наридаги рекорд, 24% даражасигача кўтарилиши (чакана кредит лар 25,2%, корпоратив кредитлар 23,1%), депозитлар бўйича ставкаларнинг янги чўққиларни пайпаслашда давом этаётгани (чакана депозитлар 21,5%, корпоратив депозитлар 17,9%) гўёки ойболта усулларини ишга туширишни жозибалидек қилиб кўрсатади. Лекин, ўша сиёсий топшириқдаям Бозор механизмлари асосида иш тутилиши кераклиги айтилгани, ўзаро мулоқотларда янги эгилувчан ечимларни қидиришга уринилаётгани маъмурий ўтмишга қайтиш рўй бермаслигига қандайдир умидлар уйғотади.