Микромолия ташкилотларининг кредит портфели банкларникидан тозароқ Марказий банк 2023 йил якулари бўйича Нобанк кредит ташкилотларининг молиявий ҳолати тўғрисидаги шарҳни тақдим этмоқда. Шарҳда микромолия ташкилотларининг натижалари жуда қизиқ, айниқса тижорат банкларига солиштирганда. Демак, 2023 йил давомида микромолимя ташкилотлари сони биттага камайган ва 84тани ташкил этган. Уларнинг активлари 2,2 баробарга, 4,5 трлн.сўмгача ўсган. Кредит қўйилмалари эса 2,3 баробарга ўсиб, 4,1 трлн.сўмга етган. Бошқача айтганда, ҳозирда микромолия ташкилотларининг жами актив ва кредит кўлами энг кичик 10та банкникидан кўпроқ. Микромолия ташкилотларининг муаммоли кредитлари (NPL 90+) қолдиғи 88 млрд.сўмни ташкил этган, ёки портфелнинг 2,1%и. Солиштириш учун тижорат банкларида NPL улуши расмий ҳисоботларда 3,5% этиб кўрсатилади (кредит фоизи қанча юқори бўлса риск шунча юқори бўлиши ҳақидаги андозалар миф эканлиги яна бир яққол мисол). Микромолия ташкилотларининг капитали йил давомида 1,5 баробарга кўпайган ва 2,2 трлн.сўмни ташкил этган. Улар жами 675 млрд.сўм соф фойда олишган ва 39%лик капитал рентабеллигини кўрсатишган. Солиштириш учун банкларнинг капитал рентабеллиги 14,2%. Микромолия ташкилотларининг юқори натижалари нима билан боғлиқ, деган савол қўйилса, бу сегментда қўли тегса ҳамма нарсани бузадиган ўзбек чиновнигининг аралашуви йўқлигида, регулятор яратган тенг имкониятларда, қанақадир зараркунанда имтиёзлар мавжуд эмаслигида, деган жавоб энг тўғриси бўлади. Эслатиб ўтамиз, белгиланган вазифалар ўз вақтида бажарилса, 2024 йил 1 апрелдан бошлаб 50 млрд.сўм билан микромолия банкларини ташкил этиш мумкин бўлади. Микромолия ташкилотларининг микромолия банкларига айланишларига ҳуқуқий асос пайдо бўлади. Микромолия банки тижорат банкидан унинг хорижий банклар билан вакиллик муносабатлари бўлмаслиги ва ташқи савдо операциялари бўйича хизмат кўрсатмаслигидан, шунингдек, рухсат берилган операцияларнинг энг кўп миқдори чеклангани билан фарқланади.