Муҳим Ютуқ, лекин бу ҳали Ғалаба эмас Солиқ кодексининг баҳсли 227-1-моддаси бўйича 100 млн сўм жаримага тортилган умумий овқатланиш шохобчаси иши судда кўриб чиқилиб, тадбиркор фойдасига ҳал қилув қарори чиқарилган. “Бу кейсда Солиқ кодексининг 227-1 моддаси бўйича тадбиркорга 100 млн сўм жарима қўлланган эди. Бизнинг ҳолатимизда корхона R_keeper дастуридан фойдаланган, лекин харидорга чек бермаган. Шу сабабдан 5 млн сўм жарима ва 227-1-модда бўйича R_keeper дастури интеграция қилинмаган деган масала билан ўтган чоракдаги 3 ойлик тушуми миқдорида жарима қўлланган, бу жарима жами 100 млн сўмни ташкил қилади. Биз судда солиқ органи томонидан 227-1-модда нотўғри талқин қилинаётганини кўрсатиб бердик”, деб изоҳ берган солиқ маслаҳатчиси Мурод Муҳаммаджонов. Биринчи фикр шуки, мазкур даъвони қўзғатган солиқчилар, гарчи 2023 йил декабрдаги йиғилишда айтилганидек "судда синиб қайтгани" учун ишдан олинмаслиги керак (солиқчилар ҳам судда ютқазиши мумкин, агар процесс ташқи аралашувларсиз ва тенг тортишувларга асосланса). Қайтанга солиқчиларимизнинг шу каби аналогдаги даъволари қайтариб олиниши соғлом қадам бўлган бўларди. Иккинчидан, ўша учрашувда ваъда қилинган ва компромисс деб кўрилган қадамлар ҳалигача ҳуқуқий жиҳатдан расмийлаштирилгани йўқ. Керак бўлса, бир кунда уч ўқишда ҳар қандай лойиҳани тасдиқлаб берадиган қонун ижодкорларимиз 50 кундан бери жарима миқдорини тушириш, қўлланган 400 млрд сўмлик жарималарни ҳисобдан чиқариш борасидаги "аминистия" масаласида сукут сақлашда давом этишмоқда. Шу маънода умумий овқатланиш шохобчаси ишининг тадбиркор фойдасига ҳал бўлгани бу Ютуқ, лекин ҳали Ғалаба эмас.