Расмийларга кўра шохобчаларга газ ва бензин етказиш кўпайган Кеча, 26 февраль куни 626 та газ заправка орқали 4 053 минг куб газ тарқатилган. Бир заправка сотган газ миқдори 25 февралга нисбатан бироз ортган ва 6,47 минг кубга етган (+0,07 минг куб). Кеча «Газета.uz» Энергетика вазирлигидан туман ва вилоятлар бўйича иш бошлаган ёқилғи қуйиш шохобчалари ҳамда уларнинг иш тартиби ҳақида маълумот беришни сўраган эди. Лекин ҳалигача бирон марта ишлаётган газ заправкаларнинг рўйхатиям, ваъда қилинган режа-график ҳам очиқлангани йўқ. Айрим кузатувчан ҳайдовчиларга кўра, пойтахт атрофидаги ва пойтахтнинг ичкари кўчаларида жойлашган газ заправкалари ярим тундан сўнг, соат 1дан 3гача очилмоқда. 26 февраль куни АЁҚШларга 5 049 тонна бензин етказиб берилган. Бу 22 февраль, жума кунги кўрсаткичга нисбатан 717 тонна кўпроқ. Ўзбекистонда ҳаво ҳароратининг совуши билан энергетик етишмовчиликнинг кузатилаётганига бугун 10 кун бўлди. Прогнозларга кўра, -5дан +5 гача бўлган ҳарорат яна 1 ҳафта сақланиб қолиши кутилмоқда.