​Ёқилғи ва энергия нархларининг қимматлашиши хавотири кескин ошган Инфляция кутилмаларининг омиллар рўйхатида ёқилғи ва энергия нархининг қимматлашуви хавотирлари энг юқори даражада ошган. Сўровномада иштирок этган аҳолининг 54%и, бизнеснинг 49%и келгусида нархлар ошиши айнан ёқилғи ва энергия нархларининг ошиши ҳисобига юз беради, деб ҳисобламоқда. Гарчи ҳали тарифларнинг ошиши эълон қилинмаган бўлсада, мазкур кўрсаткич таннархни шиширишни тарифларга юкламоқчи бўлаётган шонли энергетикларга бўлган ишончсизлик ортаётгани билан боғлиқ бўлиши ҳам мумкин. Ҳудудлар ўртасида пессимистик кайфият бўйича Самарқанд Тошкент шаҳрини ҳам ортда қолдирган. Самарқандликлар 15,8% (аҳоли) ва 16,0%лик (бизнес) инфляция кутишмоқда. Айни вақтда Тошкент шаҳрида ҳам инфляцион кутилмалар янада ёмонлашган. Пойтахтда аҳоли 15,7% (+0,8%), бизнес 15,1%лик (+1,5%) инфляция бўлишини кутмоқда. Аҳоли гуруҳлари ўртасида пенсионерлар бирдан оптимист, тиббиётдагилар эса пессимист бўлиб қолгани қизиқ. Январда 15,2% нархлар ўсишини кутган пенсионерлар февралга келиб ўз кутилмаларини 13,2%га пасайтиришган. Дўхтирларнинг кутилмалари эса 12,8%дан 15,%гача ошган. Бундай ҳалинчаклар қандайдир кенгроқ изоҳланиши керак. 10 млн.сўмдан юқори даромад эгалари бўлган аҳоли гуруҳларининг инфляцион кутилмалари ошишда давом этмоқда. Даромадга эга бўлмаган қатламнинг инфляцион кутилмалари пасайиб бораётгани ҳам чуқурроқ ўрганишни талаб этади, балки бу ҳолат нарх ўзгаришлари билан боғлиқ етарли ахборотга эга бўлмасликдан бўлиши мумкин.