Савдо балансидаги тақчиллик сақланади Марказий банк бошқаруви асосий ставкани йиллик 14 фоиз даражасида сақлаб қолиш тўғрисида қарор қабул қилган йиғилишда қатор кўпчилик кутаётган муҳим ишораларни ҳам очиқлаган. Демак, регуляторга кўра, импорт динамикасида машина ва ускуналар, энергетика ва нефть маҳсулотлари, қора металлар импортининг юқори ўсиши давом этиши бир томондан келгусида ишлаб чиқариш ҳажмлари ошишига замин яратса, иккинчи томондан савдо баланси тақчиллигининг сақланиб қолишини ҳам билдиради. Айрим тармоқларда, хусусан йил бошидан озиқ-овқат маҳсулотлари ишлаб чиқариш динамикасининг сустлашиши қисқа муддатли истиқболда ички бозорда талаб ва таклиф номутаносиблигини келтириб чиқариши ёки импортга қўшимча босимни яратиши мумкин. Марказий банк жорий операциялар ҳисобининг мувозанатга келиши белгиланган фискал интизомга боғламоқда. Шунингдек, фоиз ставкаларини бирдан пасайишини ҳам кутмаслик керак, бунга вақт керак. Пул-кредит сиёсати операцион механизмига киритилган сўнгги ўзгартиришлар қисқа муддатли пуллар нархини пасайтириш орқали келгусида кредитлар бўйича фоиз ставкаларининг ҳам пасайишига замин яратиб боради.