Метронинг Мирзо Улуғбек бекатидан Новза бекати томонга юрсангиз, кўзингиз Бунёдкор кўчаси оралиғи бўйлаб жуда чиройли йўлакка тушади. Йўлакнинг рангларидан у пиёда ва велосипедчилар учун қилинганини англайсиз. Лекин йўлакка ўтиб олиш учун, ҳаттоки коляска етакламаган ё аравачада бўлмасангиз ҳам анча уринишингизга ва ҳаётингизни хавфга қўйишингизга тўғри келади. Чунки пиёда ё велосипедчи бу йўлакка ўтиши учун бирлаштирувчи ё йўналтирувчи йўлак йўқ. Бир амаллаб ўтиб олдингиз ҳам дейлик. Энди Новзага етгуча 2 марта яна автомобил йўлини кесиб ўтишингизга тўғри келади. Новзага етиб олгач, йўлакдан чиқишингиз учун яна бир машаққат чекасиз. Новзадаги пиёдаларни жазолаш учун қилинган кўприкдан ўтгач, йўлак давом этади. Яна ҳаётингизни хавфга қўйиб йўлакка ўтиб олиб, Ўзтелеком биносигача боришда орада яна бир марта автомобиллар йўлини кесасиз. Шу билан тупикка тиқиласиз. Сиз айтишингиз мумкин йўлакка ўтиш учун инфратузилма қилишга улгуришмаган бўлишлари мумкин деб. Лекин қанчадир миллиаррдга тушган бу йўлак қурилганига бир неча ой бўлди. Йўлакка ўтиш жисмоний имконсиз бўлгани учун пиёдалар ундан фойдалана олишаётгани йўқ, автотеррористлар эгаллаб олган, кўлмак ва ямаларни айланиб, совет давридан буён янгиланмаган тротуардан фойдаланишда давом этишмоқда. Энди савол: пиёдалар фойдалана олишмаётган бўлса, пиёдаларга мўлжалланмаган бўлса, бу йўлак нима учун қурилди ўзи? Бюджет ўзлаштириш учунми?