Амалдорларнинг манфаатига келганда жараён чексиз давом этаверадими? Сенат маъқуллаганидан кейин йўқолиб қолган "Манфаатлар тўқнашувининг олдини олиш тўғрисида"ги қонун 10 кун ичида Президентга юборилиши ва 60 кун ичида имзоланиши керак эди. Ҳарқалай, "сеникими, меники, бизники" дея олқишланган, тўғридан тўғри ишлаши айтилган янги Конституцияда шундай ёзилган. Сенат маъқуллаган қонунни Президент администрациясида муҳокама қилиниши деган жараён Конституцияда йўқ. Буни Акмал Бурхонов билмаслиги мумкин эмас. Ва ўзи амалдорларнинг декларациялаш билан боғлиқ мажбуриятларига келганда "жараён тўхтаб қолмаган, ишлаяпмиз" деган баҳонани яна неча йил такрорлаш мумкин? Оддий ўзбекистонликларнинг мажбуриятларига келганида, керак бўлса 3 соатда уч ўқишда қонун қабул қилинади, 3 кунга қолмай имзоланилади. Ўзбекистонликларнинг мажбуриятларига келганда бирон бир муҳокамасиз ва огоҳлантиришсиз тўловларни каррасига ошириш мумкин. Нега бунақа, Акмал Эшондедаевич? Балки коррупция ўзбек халқининг эмас, ўзбек амалдорларининг қонига сингиб кетгани учундир?