Ҳадик бор: Тошкент Тошкент туманига айланмасин Тошкентдан қолдиқ принципи бўйича сув ва свет оладиган Тошкент вилоятининг Тошкент туманидаги сув ва свет муаммолари йилдан йилга, ойдан ойга оғирлашиб бораётганини туман аҳолиси жуда яхши билади. Лекин пойтахтликлар, айниқса амалдорлар шундоқ уларнинг биқинида сув ва свет қанчалик оғир муаммога айланганини тўла тасаввур эта олмайдилар. Муаммо шундаки, яқин истиқболда Тошкент тумани яшаётган аҳволга пойтахтликлар ҳам тушиб қолишлари ҳеч гап эмас. Менда шунақа ҳадик борки, Янги Тошкентни қуришни бошлашгандан кейин Эски Тошкентда сув ҳам, электр ҳам катта муаммога айланади. Қурилгандан кейин айниқса. Бу ҳақда экологлар аллақачон огоҳ қўнғироғини чалишни бошлашган. Ўзбек чиновниклари сувнинг бошидаги Янги Тошкентга кўчиб олишгач, бутун Эски Тошкент ҳозирда Тошкент вилоятининг Тошкент тумани ҳолига тушади деб қўрқаман. Балки маҳаллама маҳалла график қилиб, ҳафтада бир водовозда сув ташишар. Балки уч соатда бир свет берадиган маҳаллабай генераторлар ўрнатилар. Маҳалла еттилиги қаторига энергетик ва сувчилар қўшилар. Ўзбек амалдорлари яна қанақа чора кўриши мумкин?