Энергосамарадорликнинг энг арзон йўли аждарҳо божлардан воз кечиш ва соғлом рақобатга асосланган тенг имкониятлар! Кечаги йиғилишда Иқтисодий комплекс раҳбариятига аҳоли ва тадбиркорларга энергия тежамкор ускуналар ҳамда қуёш панелларини сотиб олиш имкониятларини кенгайтириш топширилди. Бу жуда тўғри ишора. Тўғри, амалда Иқтисодий комплекс қандай қарор қабул қилади ва бунда нималарга таянади, айтиш қийин. Лекин, соғлом ақлга таянилса, энг аввало бугунги Ўзбекистонда энергетик самарадорликка аждарҳо божларнинг етказаётган зиёнга эътибор қаратмаслик мумкин эмас. Энергосамарадорликнинг иккинчи таянч нуқтаси бу соғлом рақобат ва тенг имкониятлар яратиш бўлиши керак. Мана қаранг, корхонасида қуёш панеллари қўймоқчи бўлган тадбиркорлардан бири нима демоқда: “Ўзбекистонда бутловчи қисмларни божсиз олиб кириш иккита корхонага берилган экан”. Яъни, Ўзбекистонга қуёш панеллари учун бутловчи қисмларни божсиз олиб кириш иккита қанақадир корчалонга берилган. Бу икки корчалон аслида битта чўнтакми ва бу чўнтакнинг шонлик энергетикларга қанақа алоқаси борлиги яна бир масала. Кўраяпсизми, тизим қаердан бошлаб бузилган? Қолган бечоралар энергосамарадорлткни истаса, бож тўлаши керак. Иқтибос: "қуёш панелининг ўзини ишлата олмаймиз-ку, бутловчи қисмлари билан киради. Ҳозирги кунда 6 мегаваттлик қуёш панелларимиз учун тахминан 80-90 минг доллар атрофида бож чиқяпти. Икки хил ТИФ ТН код қўйилган, [ваҳоланки], битта яхлит товар бўлиб келяпти". Панель ўрнатишга иши тушганки аҳоли, тадбиркор билади, панелбозлик кампанияси бошлангандан буён, импортни марказлаштирилгани ва маъмурий буюртмалар концентрацияси оқибатида нархлар ўртача 2 баробарига ошди, агар кўпроқ бўлмаса. Биз шу йўл билан энергосамарадорликка эришамизми? Қанақадир кампаниябозлар, шонли энергетиклар бизни энергосамарадор қилиб қўймайди (қайтанга уларнинг қилаётган иши ўзбек иқтисодиётини самарасизликка етакламоқда). Бизни, иқтисодиётимизни самарали қилса, тенг имкониятлар ва соғлом рақобат самарали қилади.