Мўлжалдагидан 2,5 трлн.сўм кам: Пенсия, нафақат ва иш ҳақининг оширилишига йил охиригача 7,1 трлн.сўм йўналтирилади Бу 2024 йил бюджетида мўлжалланганидан кўра 2,5 трлн.сўм камроқ. 2024 йил бюджетига кўра, иш ҳақи, пенсиялар, стипендиялар ва нафақалар миқдорини оширишга 9,6 трлн.сўм сарфлаш мўлжалланган. Бюджетномага кўра, иш ҳақи миқдорининг қўшимча равишда 1 фоизга оширилиши йилига 1,3 трлн сўм атрофида, пенсия миқдорининг 1 фоизга оширилиши эса 600 млрд сўм миқдорида қўшимча харажатлар талаб этади. Бу дегани, 2024 йил 1 сентябрдан пенсия ва нафақаларнинг 15%га ошгани йил охиригача бўлган 4 ойга 3 трлн.сўм, иш ҳақи миқдорининг 1 октябрдан ўртача 12,5%га ошади деб олсак (15% ўқитувчи ва шифокорларга, 10% қолганларга), йил охиригача бўлган 3 ойга 4,1 трлн.сўм атрофида, жами 7,1 трлн.сўм харажат бўлишини англатади. Қолган 2,5 трлн.сўм-чи? Қолган 2,5 трлн.сўмни субсидия олишга мазахўрак бўлиб қолган энергетиклардан сўраш керак бўлади. Қўпол бўлсаям айтиш керак, қора ўпқонга айланган энергетика ўқитувчи ва шифокорнинг ойлигидан тортиб, нуронийларнинг пенсияси, бева ва етимларнинг нафақасигача домига тортиб кетмоқда.