​Аҳоли омонатлари ва корпоратив депозитлар ставкаларидаги фарқ 5,4 фоиз бандига етган Июль ойи якунлари бўйича миллий валютадаги муддатли банк депозитлари ўртача тортилган ставкаси 0,7 фоиз бандига пасайиб, 19,3%ни ташкил этган. Айни вақтда аҳоли омонатларининг нархи 22,1% (+0,1%)гача кўтарилган. Корпоратив депозитлар ставкаси 16,7%гача тушиб кетган (-1,2%). Аҳоли омонатлари ва корпоратив депозитлар ставкаларидаги фарқ янги рекорд, 5,4 фоиз бандига етган, бу фарқликни шартли равишда коррупция маржаси деб аташ мумкин. Чунки аҳоли омонатлари бозор ставкасида жойлаштирилса, асосан давлат корхоналари қўлида жамланган корпоратив депозитларнинг жойлаштирилиши умуман бозорга алоқаси бўлмаган ставкаларда ва маъмурий, кўпинча коррупцион келишувли воситалар асосида юз беради. Миллий валютадаги кредитларнинг ўртача тортилган ставкаси 23,5%ни ташкил этган (-0,1%). Бунда чакана кредитлар ставкаси 24,2%гача пасайган бўлса, корпоратив кредитлар 22,9%гача (+0,2%) қимматлаган. Бошқача айтганда, депозитлар ставкаларининг пасайтирилиши ҳозирча кредитлар ставкаларига таъсир ўтказишни бошлагани йўқ.