Шонли энергетиклар электр бўйича субсидиядан воз кечадими? Ўтаётган ҳафтада Энергетика вазирлигининг бир маълумоти жамоатчилик ва ОАВнинг эътиборидан четда қолди. Вазирлик тизимга юкламалар, аҳолининг электр энергиясидан узилишлари ва авариялар сони камайиб бораётгани ҳақида навбатчи шаблонлардан ташқари мана бу баёнотни эълон қилди: "Келиб тушаётган қўшимча тушумлар салмоғидан келиб чиқиб, жорий йилнинг иккинчи ярим йиллиги учун субсидияга зарурат кам бўлиши ёки батамом бўлмаслиги прогноз қилинмоқда". Албатта, биринчидан, бу баёнотни энергетикларнинг ўзига яна эслатиш учун эслаб қоламиз. Чунки "августдан ҳаммаси яхши бўлиб кетиши" қабилидаги гаплар биринчи марта эмас. Иккинчидан, электр энергиясининг 1002 сўмгача шиширилган таннархи камайтирилмагунча булар субсидиядан воз кеча олишмайди. Яъни субсидиядан воз кечиш учун газ-электр занжиридаги тўғридан тўғри ўғирликлардан воз кечиш керак. 25%гача дейилган йўқотиш лейблли ўғирликлардан воз кечиш керак. Тармоқлар ва станцияларни қайта ва қайта таъмирлаб пул ўзлаштиришни тўхтатиш керак. Каррасига қимматлаштирилган лойиҳалардан воз кечиш керак. Соҳага рақобат кириши керак (нафақат генерацияга). Дўстлик ордени соҳиби вазир Мирзамаҳмудов буни билмаслиги мумкин эмас. Учинчидан, шаффофлик керак. Яна 2 йилдан кейин бозорга ўтиш режаларига ҳеч ким ишонаётгани йўқ. Ишонмайдиям, токи шаффофлик бўлмагунча. Расмий статистика бўйича 7 ойда 42,8 млрд.кВт.соат ишлаб чиқарилган, энергетикларнинг ўзи 47,8 млрд.кВт.соат электр ишлаб чиқарилди деб ётипти. 5 млрд.кВт.соат электр энергияси қаердан қўшилди? Наҳотки, генерациялар қирқимида маълумот бериш, бергандаям онлайн йўлга қўйиш мумкинмас? Очинглар, қайси станция тармоққа қанча электр бераяпти, эски станциялардан тортиб қуёш станцияларигача, тадбиркорлар ўрнатган станцияларгача ҳаммасини очинглар. Ёнига ёзиб қўйинглар ҳар бир станция тармоққа бераётган электр бўйича сотиб олиш тарифини. Шунда тенденцияга қараб, ўзимиз билиб оламиз, субсидиядан воз кечиладими ва қачон воз кечилади.