Импортга қарамлик қўрқинчли даражада ошиши фонида газ экспорти 2,4 каррага кўпайган Август ойида газ импорти ўтган йилнинг августига нисбатан 210 карра ошган (0,8 млн.доллардан 168,3 млн.долларгача). 8 ойлик газ импорти 5,7 каррага кўпайган (201,8 млн.доллардан 1 152 млн.долларгача). Қаҳратон қишда эмас, ёзнинг қоқ ўртасида газ импортини оширмоқдамиз. Парадокснинг давоми шундаги, газ импорти потираб ошаётгани ва газ қазиб олиш қисқариши тезлашиб бераётганига қарамай, газ экспорти тўхтагани йўқ. Августда газ экспорти ўтган йилнинг августига нисбатан 2,4 каррага ошган (36,0 млн.доллардан 86,3 млн.долларгача). Газ импорти бюджетдан триллионлаб миқдорда субсидияланаётган шароитда қайси чўнтаклар қайси яширин қарорлар асосида газни экспорт қилаётганини биронта партия сўраб қолар, балки. Ҳартугул сайлов палов кампанияси кетмоқда. Ўқитувчи, дўхтир, пенсионер, ногиронларнинг манфааатлари ҳимоячисимиз дегувчилар, масалан. Ижтимоий соҳани молиялаштиришга йўналтирилиши керак бўлган бюджет маблағлари кўз ўнгимизда шимолга қараб оқмоқда. Энергоқарамликнинг ошиши айнан Россиянинг босқинчилик уруши бошлангач ва агрессорнинг энергоресурсларига санкциялар жорий қилингач кескин ошгани ажаблантирмаслиги мумкин эмас. Нормал дунё Россиянинг энергоресурсларига боғлиқликдан қутулиш ва диверсификация йўлига кирганида, Ўзбекистон қайтанга қарамликни кескин ошириш томон кетмоқда. Гап фақат газ ҳақида кетмаяпти. Масалан, уруш бошлангандан буён нефть ва нефть маҳсулотлари импорти 2,3 карра ошган.