Антикоррупция агентлигига яширин қарорлар билан берилган имтиёзлар ҳақида маълумот беришмаган кўринади Коррупцияга қарши кураш агентлиги солиқ ва божхона имтиёзларидан фойдаланиш ҳолатларини таҳлил қилган. Янги даврда имтиёзлар тарқатиш бозор иштирокчиларига тенг имкониятлар яратиш ва эркин рақобатни рағбатлантириш йўлида энг катта муаммолардан бирига айланган. Шу маънода Агентликнинг бу ҳаракатларини олқишлаш ва қўллаб-қувватлаш керак. Лекин очиқланган маълумотлар, хусусан божхона имтиёзлари олган топ имтиёзхўрлар рўйхатини кўздан кечириб, бу рўйхат тўлиқ ва батафсил эмаслигига эътибор қаратмаслик мумкин эмас. Масалан, рўйхатда UzAutoMotors АЖ умуман йўқ. Мазкур монополист 1-чоракнинг ўзида импорт божларидан 625 млрд.сўмлик имтиёз олган. Ёки бўлмасам, "ADM JIZZAKH" МЧЖ агентлик рўйхатида 6 ойда атига 158,6 млрд.сўмлик божхона имтиёзи олгани қайд этилган. Лекин электромобиллар учун бож киритилишини ва нотариф тўсиқлар жорий этишни талаб этаётган шу компания 1- чоракнинг ўзида 1,4 трлн.сўмлик божхона имтиёзларидан фойдаланган. Бу қанақасига дейишингиз мумкин. Гап шундаки, UzautoMotors АЖ ва "ADM JIZZAKH" МЧЖ яширин қарорлар асосида божхона имтиёзларидан фойдаланади (божсиз ва ҳатто айрим ҳолатларда ҚҚС тўламай автомобиль импорт қилиб сотишади). Эҳтимолки, Иқтисодиёт ва молия вазирлиги Антикоррупция агентлигига яширин қарорлар билан индивидуал имтиёзлардан фойдаланаётганлар ҳақида маълумот бермаган. Lolazor'нинг охирги сонида агентлик раҳбари Акмал Бурханов билан мисли кўрилмаган коррупциянинг иқтисодий ва молиявий манбаига айланиб қолган яширин қарорлар ва яширин қарорлар билан берилаётган имтиёзлар ҳақида ҳам гаплашган эдик. Умид шуки, агентлик энди яширин қарорлар ва яширин қарорлар билан берилаётган имтиёзларни ҳам ўрганишни ва халққа очиқлашни бошлайди.