Қишлоқ хўжалиги вазирлиги пахта нархини тушириш билан боғлиқ шартномага мажбурлаш зўравонлигини оқлаб бермоқда Эсингизда бўлса, сал аввалроқ Энергетика вазирлиги бўлаётган ноқонуний ишларни тан олиш ва бартараф қилиш ўрнига "қуёш панелига мажбурлаш йўқ" деган кулгули баёнот берган эди. Натижада шундан кейин тадбиркорларни қуёш панелига мажбурлаш янада кучайган, панел ўрнатмаганларнинг светини ўчириш оммавий тус олган. Қишлоқ хўжалиги вазирлиги ҳам Энергетика вазирлигининг шонли рангларидан олиб, пахта нархини пасайтириб, фермернинг нонини яримта қилиб шартнома имзолашлашга мажбурлаш ҳолатларига хаспўшлаш билан изоҳ берган. Бу зўравонлик устида турганлар қораланмаган, ўзбошимчалик қилаётган амалдорлар жазоланиши, қонун ва шартномавий муносабатлар устуворлиги эслатилмаган. Вазирлик ўзи саволлик бўлган ҳукумат қарори ҳарфи ва руҳи бўйича ҳам фьючерс шартномалари ўзгартириш киритилиши фермернинг ихтиёрига кўра амалга оширилиши мумкинлигини қайд этмаган ҳатто. Бу баёнот жойларда ўзбошимча ва саводсиз амалдорлар учун навбатдаги ёрлиқ бўлиб хизмат қилмоқда. Қонун ишлаши кераклиги ва шартномавий муносабатларга амал қилиш лозимлиги масаласида шу кунгача маҳкам турган фермерларнинг ҳам охирги умидлари синдирилган. Формал равишда фермернинг ҳақ-ҳуқуқлари учун туриб бериши керак бўлган Фермерлар кенгашидан тортиб вазирликкача бир гала кластерлар манфаати учун дастёрдек хизмат кўрсатишга ўтишган. Энг ҳайратланарлиси, ақлга сиғмайдиган ноқонуний ишлар дастур ва шиорларида шундай ноқонуний ишларга қарши курашиш айтилаётган сайлов кампанияси авжида эканида юз бермоқда. Бунақа антиутопия ўтган ёмон замонда ҳам бўлмаган эди.