Биринчи чорак демографияси: туғилишда камайиш давом этмоқда, ўлим ортмоқда 2025 йилнинг дастлабки уч ойида 198,1 минг нафар бола туғилган. Бу 2022 йилдан буён энг кам кўрсаткич. Статқўм аҳоли демограцияси ҳисоботидан қатор маълумотларни олиб ташлаган. Ўзи бусиз ҳам қайчиланган статистиканинг юзакилиги ортган. Хусусан туғилишнинг ойлар, ҳудудлар, ота-онаси ёши, туғилишнинг чақалоқлар сони таркиби каби маълумотлар энди йўқ. Қолган бўлимларда ҳам шу каби иш тутилган. 2024 йил 1-чорак статистикаси билан ўзингиз солиштириб кўришингиз мумкин. Ўтган чоракда 41,4 минг ўлим қайд этилган. Бу ҳам 2022 йилдан буён энг юқори кўрсаткич. Ажралишлар сони худди советча планда белгиланганидек, 11,5 мингни ташкил этган (ўтган йилнинг шу даврида ҳам айни шунча ажралиш қайд этилган). Никоҳлар сони тўртинчи йил кетма-кет камаймоқда. Ўтган 3 ойда 43,8 минг никоҳ тузилган. Бундан пастроқ кўрсаткич янги даврда рўй бермаган (эҳтимолки, оғир ўтган энергокризисли қиш ва март ойининг тўлиқ рамазон ойига тўғри келиши ҳам катта таъсир ўтказган). Ички миграция асосан Тошкент шаҳри билан боғланган. Энг кўп кўчиб келиш ҳам Тошкентга (22 146), энг кўп кўчиб кетиш ҳам Тошкентдан (16 933). Хорижга кўчиб кетиш ҳолати энг кўп Қорақалпоғистонда қайд этилган (845).