Юксалиш хулосалари "ҳечдан кўра кеч" эмас, "ҳайитдан кейинги хина"га ўхшайди Уй-жой мулкдорлари ширкатларини мажбурий тугатиш бўйича тийиқсиз амалдорларнинг зўравонлиги камида 4 йилдан буён давом этмоқда. Бирон бир формал институт, у парламентми ё Антикоррупциями ёки истеъмолчилар тарафда туриши керак бўлган Антимонополиядан бу муаммо бўйича овоз чиққани йўқ. Балки қайсидир ёпиқ кабинетларда чиққандир, лекин жамоатчилик ва ОАВ эшитгани йўқ. Аввал ширкатларнинг бўйнига триллионлаб кредитларни осиб пул қилишди, ўғирланган кредитлар "списать" қилиниб ёпилди. Ширкатларга улар ҳеч қачон тўлай олмайдиган кредитлар нега йиллар давомида ажратиб келингани, кредитлар кимларнинг фойдаси учун ва қаёққа йўналтирилгани, бунда ширкатлар устига миниб олган очкўз ҳокимларнинг ўрни қандай бўлгани ҳақида саволлар қўйилмади. Ëпиғлиқ қозонлар ёпиқ қолиши учун ширкатларни тугатиб, яшовчиларга кўндаланг қўйиб қолган чўнтак бошқарув компанияларини тузишга ўтишди. Ширкатларни қандай ботқоққа ботиришган бўлса, энди бошқарув компанияларини шунақа бассейн сифатида ишлатишмоқда. Тарифлар осмон, хизмат йўқ, дардингни эшитиши керак бўлганлар зўравонларга шерик. Шунинг учун қолган-қутган охирги саноқли мустақил ширкатлар (демократия оролчалари) уларнинг кўзига олабўжи бўлиб кўринмоқда. Шу маънода Юксалиш ҳаракатининг Ўзбекистондаги бошқарувчи компаниялар тўғрисидаги хулосалари йўқдан кўра юпанчиқдек. Лекин энди бу хулосалардан не наф? Замон ва зўравонларнинг чиғириқларидан ўтиб келган, демократик бошқарув илдизларига эга юзлаб соғлом ширкатлар тугатилиб бўлинди-ку. Ҳатто қонундан ширкат билан боғлиқ мақомниям чиқариб ташлаш мумкин. Хулосаларда ўзларини етим бўталоқдек ҳимоя қилишда давом этаётган саноқли ширкатларни сақлаб қолиш ҳақида қонуний талаб тугул, чақириқларнинг йўқлиги беихтиёр "ҳайитдан кейинги хина" вариантига етаклайди.