124 млн.долларга тушган Деҳқонобод калий заводи совға қилиндими? Қурилиши Ўзбекистон халқига 124 млн.долларга тушган, кимё саноатининг энг йирик активларидан бўлган Деҳконобод калий заводи мулк ҳуқуқи 9 ой аввал рўйхатдан ўтган ва 19,6 млн.сўмлик устав капиталга эга “Asian Chemical Group” МЧЖга ўтган. Заводнинг 100% акциялари ўтган йилги қарорга кўра халқаро бозорда оммавий савдоларга чиқарилиш орқали хусусийлаштирилиши керак эди. Деҳқонобод калий заводи унга ФРРУ берган 165,1 млн.долларлик кредитни ФРРУ ўзи "ёпгани" билан машҳур бўлганди. Мана энди ким учун заводнинг кредитлари бюджет ҳисобидан ёпиб берилгани аён бўлмоқда. Қизиқ тарафи, 1 июль ҳолатига 2,9 трлн.сўмлик ўз капиталига эга Деҳқонобод калий заводининг "хусусийлаштирилиши"га нисбатан Давактив яна ҳеч қандай баёнот бермаган (Президент қарорига кўра, айнан Ортиқов жаноблари ишчи гуруҳ раҳбари эди). Бу янги дейиладиган Ўзбекистондаги навбатдаги (ҳеч ким санамай ҳам қўйди) яширин хусусийлаштириш кейси. Йилдан йилга энг йирик активларнинг хусусийлаштирилиши тобора ёпиқ ва саволли бўлиб бормоқда.