Марказий Осиёни Заковат бирлаштиради 20 август куни Қирғизистон пойтахти Бишкекда “Zakovat Asian Cup II” — Марказий Осиёнинг энг йирик интеллектуал турнири ўтказилар экан. Нимага бу турнир муҳим?Биринчидан, мамлакатнинг тараққиёти турли шиорлар, бешйиллик-ўнйилликлар, янгидан-янги қарорбозликлар билангина амалга ошмайди. Бунинг учун, аввало, уларни амалга оширишга қодир, кенг фикрли, вазиятга теран баҳо бера оладиган кадрлар керак. Иккинчидан, бундай кадрлар йўқ ердан пайдо бўлмайди, уларда нафақат ақл-заковат, балки киришимлилик, ўзига ишонч, жамоавий муҳитга мослаша олиш кўникмалари бўлиши шарт. “Zakovat” ҳаракати эса ана шундай кўникмаларни ошириш учун катта майдон бўлмоқда. Учинчидан, айни шу ҳаракатга ҳукумат миқиёсида эътибор берилаётганлиги, унинг телекўрсатувдан халқаро ҳаракат даражасига етгани одамга бироз умид беради. Бугун “Zakovat” катта халқаро ҳаракатга айланиб, юртимиздан ташқарига ҳам чиқмоқда. Мисол учун, ўтган йили Қозоғистон пойтахти Астанада катта турнир — “Zakovat Asian Cup” ўтказилди ва бу орқали икки мамлакат ёшлари интеллектуал, маданий мулоқот алмашинишди. Эндиликда кубок баҳсларининг иккинчи мавсуми қардош Қирғизистон пойтахти Бишкек шаҳрида ўтказиляпти. Навбатдаги ўйинда ҳам ўзбекистонлик ва қирғизистонлик ёшлар ўртасида маданий-интеллектуал мулоқотни ўрнатиш, дўстлик ришталарини мустаҳкамлаш имкониятини қўлга киритади. Бундай тадбирларнинг Марказий Осиё пойтахтлари бўйлаб давомий ташкиллаштирилаётганлиги интеграция учун ҳам яхши сигнал.