Ёпишмаяпти: 8 миллион расмий банддан фақат 6 миллиони даромад солиғи тўлайди Расмийлар ўзлари эълон қилаётган рақамларни бир-бирига солиштирсак, Давлетовўз Бюджетномага таяниб бераётган ноқулай саволлар янада кўпайиб кетади. Расмий маълумотларга кўра, 2025 йил 1 июль ҳолатига 8 миллион расмий банд аҳоли қайд этилган. 2025 йил 1 июль ҳолатига 5,5 млн. ўзбандлик рўйхатга олинган. Расмий банд дейилган 8 млн.лик рақамга ўзбандлар кирадими ё йўқми? Кирса, 6 млн.нафар даромад солиғи тўловчилар чиқариб ташланса, унда расмий бандлар қаторида атига 2 млн. ўзбанд қолади. Агар кирмаса, 5,5 млн. ўзбанд қайси рақам ичида ўтирипти? Ҳа, Ўзбандлар даромад солиғи тўловчиси эмас, лекин агар даромади 100 млн.сўмдан ошса, айланмадан 4% солиқ тўлайди (келаси йилдан барча айланмадан 1% солиқ тўлайди). Бюджетномага кўра, айланмадан солиқ тўловчилар сони ҳам ўсмаган (қайтанга дорихоналар ҚҚСга ўтгани сабабли камайган). Буёғиям ёпишмаяпти. Шундай экан ҳадеб чиройли рақамларга маҳлиё бўлиб, 3 миллион, 5 миллион бандлик таъминланди, қабилидаги рапортлар ўрнига маҳражни амалда тўланаётган солиқдан келиб чиқиб олайлик. Ёлланма ишчи ижтимоий солиқ ва даромад солиғи тўламаяптими, демак у расмий банд эмас. Ўзбанд айланмадан солиқ ва бир марталик ижтимоий солиқ тўламаяптими, демак униям расмий бандга қўшмаслик керак. Шунда ўнг қўл ва чап қўлдаги рақамлар бир-бирига мос келади ва тўғри рақамлар билан тўғри қарорлар қабул қила бошлаймиз.