​5,5 миллион (ёки 2,8 миллион) ўзбандлар учун ижтимоий солиқ каррасига ошади, бошқа имтиёзлиларга-чи? Келаси йилдан бошлаб ўзбандлар ихтиёрий эмас, мажбурий тартибда ижтимоий солиқ тўлашга ўтказилиши мумкин (бу ҳақда пенсия ислоҳоти бўйича йиғилишда ҳам, фискал стратегияда ҳам ишоралар берилганди). Фискал диалогда қатнашган Spot нашрининг ёзишича, якка тартибдаги тадбиркорлар ва ўзбандларнинг ижтимоий солиқ бўйича тўлови бирхиллаштирилиши режа қилинган ва агар бу таклифи амалга ошса, ҳар икки тоифа йилига 1 960 000 сўмдан (ойига эса 163 200 сўмдан ижтимоий солиқ тўлашга ўтади). Ҳозирда якка тартибдаги тадбиркорлар мажбурий ойига 1 БХМ (440 000 сўм), йилига эса 5 280 000 сўм ижтимоий солиқ тўлайди, ўзбандлар эса ихтиёрий равишда 1 БҲМ (440 000 сўм) тўлаши мумкин. Институт таклифи қонунга кўчса, якка тартибдаги тадбиркорлар учун ижтимойи солиқ юки 2,5 карра камайиши, ўзбандлар учну эса 4 карра ошиши мумкин. Маълумот учун айтиш керакки, якка тартибдаги тадбиркорлар ўзбандлардан фарқли ўлароқ 5 нафаргача ходим ёллаши ва чакана савдо билан шуғулланиши мумкин, шунинг учун амалдаги фарқлик тушунарлидек кўринарди. Агар, таклиф этилганидек тенглаштириш бўлса, солиқ тушумларидан давлат ютади. Ҳозирда (2026 йил 1 июль ҳолатига) 375,1 минг якка тартибдаги тадбиркор бор бўлса, ўзбандлар сони ё 2,8 млн ёки 5,5 млн (ҳалиям аниқлик кирита олишмади). Адолат, албатта, керак. Тенглик, албатта, керак. Лекин, якка тартибдаги тадбиркорлар ва ўзбандларга ишлатилаётган адолат ижтимоий солиқ бўйича очиқ ва яширин имтиёз олган (озод бўлган) олигархлар ва корчалонларга нисбатан, турли соҳалар ва ҳудудларга тақдим этилган 1%лик ижтимоий солиқ тўловчиларга қўлланмаслиги керак? Хўп, айтишлари мумкин, уларга ҳали имтиёзларнинг муддати тугамаган. Лекин барака топгурлар, ҳеч бўлмаса, минимум киритса бўладику (ойига 163 200 сўм). Президент ва Вазирлар Маҳкамасининг қарорлари билан мол-мулк солиғи ҳамда ер солиғини тўлашдан тўлиқ озод қилинган юридик шахслар – мол-мулк ва ер солиқлари тўловчилар мазкур солиқларни солиқлардан ҳисобланган сумманинг 1%и миқдорида тўлашадику. Лекин шу аналог қўлланилиши мумкинмас? Қудрат фақат заифларга ва кичикларга эмас, кучлиларга ва корчалонларга ҳам бирдек ишлатилсагина адолатга айланади. Шунда бу адолатга ишонч яралади.