Ўзбекнефтегаз 7 ойлик МЧЖ билан 1,8 трлн.сўмлик тендерсиз битим тузган Ўзбекнефтегаз 2025 йилнинг 10,5 ойи давомида 9,7 трлн.сўмлик тўғридан-тўғри битимлар тузган. Тендерсиз битимларнинг 53%и бешта субъект ҳисобига тўғри келади. Эътиборлиси, энг катта тендерсиз 1,8 трлн.сўмлик битим давлат рўйхатидан ўтганига 7 ой бўлган MAQSAD PETROLEUM МЧЖ билан амалга оширилган. Кейинги ўринни TECHENERGY МЧЖ билан умумий қиймати 1,2 трлн.сўмлик битимлар эгаллаган. KPMG аудиторлик ҳисоботига кўра, шу икки МЧЖ Ўзбекнефтегазнинг 10,1 трлн.сўмлик капитал харажатлар бўйича энг катта кредиторлари ҳисобланади (Авария рўй берган аномал газ қудуғини ковлаётган ёки озарлар билан лойиҳадаги пудратчилар бўлмаса керак). Ўзбекнефтегазни триллионлаб қарз қилиб қўйган "MAQSAD PETROLEUM" МЧЖ таъсисчиси Одилов Улуғбек Дилшоджон ўғли ёқилғи-энергетика сегментида яна бир неча компания таъсисчиси ҳисобланади. Яна бир йирик тендерсиз битим Beijing Raykin Steel Pipe Industry Co., Ltd. билан тузилган (339 526 доллар ва 39,8 млрд.сўм). Муддати ва моҳиятига эътибор берилса, бу битим метан газ ташийдиган пиар контейнерлар сотиб олиш билан боғлиқ бўлиши мумкин (яқин уч ойда хитойликлар билан бундан бошқа йирик шартнома тузилмаган). Бунча катта тендерсиз шартномалар тузишга пул қаердан олинган, дейишингиз мумкин. Аудиторлик ҳисоботига кўра, Ўзбекнефтегаз охирги 3 ойда 3,3 трлн.сўмлик қарз шартномалари тузган, шундан, 1,9 трлн.сўмини ўзбек банклари берган. Дарвоқе, 1 декабрь куни S&P Global Ratings “Ўзбекнефтгаз” АЖнинг узоқ муддатли кредит рейтингини “B+”дан “BB-” даражасига кўтарган (релиз айни дам 404 бўлиб, ўчиб қолган). P.S. Рейтинг релизи - янги ҳавола.