​Ўзбекнефтегаз ФРРУ ва ўзбек банкларидан қарз жамғаришни бошлаган 2024 йил учун Ўзбекнефтегаз молиявий ҳисоботлари аудитдан ўтказиш KPMG'га ўтган. Қайд этилишича, 2024 йил июль-октябрь ойларида Ўзбекнефтегаз ўзбек банклари билан 2,5 трлн.сўмлик кредит битимлари тузган. Шунингдек, монополист ФРРУдан 100 млн.долларлик кредит маблағлари олган. Кредитларнинг нархи ва қайси лойиҳа ва мақсадларга йўналтирилгани очиқланмаган. ФРРУдан олинган 100 млн.долларнинг Афғонистондаги лойиҳалар учунми ё пудрат қиролига боғланган навбатдаги бошқа лойиҳани молиялаштириш учунми, номаълум. Эҳтимолки, ўзбек банкларидан олинаётган кредитлар хорижий кредиторлар олдидаги мажбуриятларни сўндириш учун йўналтирилмоқда. 2024 йилнинг 6 ойида 3 трлн.сўмлик қарз жамғарилган бўлса, 4,9 трлн.сўмлик қарз қайтарилган. Июлдан октябргача яна 2,7 трлн.сўмлик қарз қайтарилган (маълумот учун Ўзбекнефтегаз яна ташқи қарз бозорига чиқмоқчи). Ўзбекнефтегазнинг 1,2 трлн.сўмли капитал характерига эга мажбуриятлари шакллангани кўрсатилган. Қудуқларни бурғулаш учун, хусусан ХК «ENTER ENGINEERING», ХК «ERIELL OILFIELD SERVICES MIDDLE EAST DMC" компаниялари олдида мажбуриятлар пайдо бўлган (суммалари алоҳида кўрсатилмаган). Аудитор монополистнинг энг қиммат активи Uzbekistan GTL'да амортизация ҳисоблаш тўғри чизиқлидан ишлаб чиқариш усулига ўзгартирилганини кўрсатган. Бу куз ва қиш даврида газдан узиладиган ва 30% қувватда ишламаётган 4 млрд.долларлик заводнинг зарардан фойдага чиққан қилиб кўрсатиш учун амалга оширилган бўлиши мумкин. Каррасига қимматлаштирилган Uzbekistan GTL'нинг молиявий натижалари у очилган пайтдан буён бирон марта очиқланмаган (ҳатто аудит ҳисоботлари орқали ҳам). Компаниянинг ликвидлиги оғирлигича қолмоқда. 2024 йилнинг 6 ойида пул маблағлари ва эквивалентлар 960 млрд.сўмдан 636 млрд.сўмгача қисқарган. Ишлаб чиқариш харажатлари кескин, 1,9 трлн.сўмдан 2,8 трлн.сўмгача ошган. Ремонт ва техник хизмат кўрсатиш харажатлари 2 каррадан кўпга, хизматлар харажати 1,5 карра ошган. 138 млрд.сўмлик ҳомийлик ёрдами кўрсатилган (ўтган йили шу даврда 174 млрд.сўм). Компаниянинг фойда солиғи бўйича самарали солиқ ставкаси 8,4%гача пасайган. Ўзтрансгазнинг Uz-Ког Gas Chemical олдидаги 10,0 трлн.сўмлик (812,3 млн.долларлик) қарзини Ўзбекнефтегазга илиш бўйича схемага боғлиқ яна бир битим ўтказилган. Uz-Ког Gas Chemical'га берилган 344 млн.долларлик (ва ҳисобланган фоизлари 244,3 млн.долларлик) субординар қарз бўйича талаб қилиш ҳуқуқи Ўзтрансга ўтказилган. Компания учун иқтисодий маънога бўлмаган мазкур битим ҳақида бирон марта расмий баёнот берилмаган. Ўзбекнефтегаз, яъни ўзбекистонликлар бўйнига осилган 10 трлн.қарз қаердан шакллангани ҳақида мана бу ерда ўқишингиз мумкин. Эътиборлиси, монополист маҳсулотлари 100% Ўзбекистон ичида сотилган (махфий қарор билан ташқарига дисконт билан сотилаётган GTL дизели қаёққа экспортга кетаяпти унда ёки ўртамчилар орқали сотилаяптими?). Ҳисоботнинг инглиз тилидаги варианти эълон қилинмаган.