Ўзбекнефтегазнинг ўзи ёмон аҳволи янада оғирлашган 2023 йил якунлари бўйича Ўзбекнефтегазнинг алоҳида ва консолидациялашган молиявий ҳисоботлари тубга инаётган монополистнинг аҳволи янада оғирлашганини кўрсатади. Ликвидлик кескин камайган. Пул маблағлари қолдиғи 2 487 млрд.сўмдан 960 млрд.сўмгача қисқарган. Дебитор қарзлар ортган. Дебиторлар жами 3 905 млрд.сўмдан 5 265 млрд.сўмгача етган. Дебиторлар ортганига қарамай, йўқотишлар учун захиралар камайган. Ўзтрансгазнинг Uz-Kor Gas Chemical олдидаги Ўзбекнефтегаз бўйнига илинган қарзи бўйича май ойида очилиб қолган битими аслида ўтган йили юз бергани маълум бўлади. Шунинг учун балансда 9 143 млрд.сўмлик қопланадиган актив пайдо бўлган (мажбуриятларда ҳам). Аффилланган томонларнинг Ўзбекнефтегазга қарзи (яна Uz−Kor Gas Chemical, Natural Gas Stream, Ўзтрансгаз билан боғлиқ) 707 млрд.сўмдан 7 558 млрд.сўмга етган. Сотиладиган активлар қиймати 1 811 млрд.сўмдан 4 887 млрд.сўмга етган. Ушбу кескиш ошиш яна ўша шонли Saneg учун совға қилинган Шўртан 2 лойиҳаси билан боғлиқ. Қандай қилиб 1,8 трлн.сўмлик актив 4,9 трлн.сўмгач шишиб қолгани бўйича аудитор тафсилотларни келтирмаган (мазкур лойиҳа балки 5 млрд.долларгача шиширилган МТОнинг бир улушига айланган бўлиши керак). Қисқа ва узоқ муддатли қарзлар кескин ошган. Узоқ муддатли 32 627 млрд.сўмлик қарзнинг 8 661 млрд.сўмлик қисми жорий йилда сўндирилиши керак. Кредиторлар ўрнида бўлганимда мен хавотирга тушган бўлардим. Ўзбекнефтегаз сўмда 26%дан, валютада 13%гача қарз олишга ўтган (одатда қарз ботқоғига ботганнинг кўзига фоиз кўринмайди). Монополистнинг шу ҳолатига 2024 йилнинг май ойида ЎзСҚБ, Ҳамкорбанк ва КДБ банклар 57 млн.доллар кредит беришган. Бошқа мажбуриятлар рўйхатида 10 039 млрд.сўмлик Air Products билан боғлиқ қарздорлик пайдо бўлган. GTL'нинг юраги иштирок этган схема ҳеч қанақа инвестиция эмаслигини, бу қип-қизил қарз эканини аввал ҳам ёзган эдик. Дарвоқе, GTL Ўзбекнефтегазнинг пул оқимлари ва мажбуриятлари бўйича энг асосий активи бўлишига қарамай, унинг кўраётган зарари 2 йилдан бери алоҳида акс эттирилаётгани йўқ (ва бошқалар қаторида). Бу аудиторнинг қамров даражасига саволлар туғдирмаслиги мумкин эмас, эртага кредиторлар ундирув билан боғлиқ муаммоларга дуч келганида, эътирозлар аудиторни четлаб ўтмайди. Консолидациялашган ҳисобот бўйича Ўзбекнефтегазнинг соф фойдаси 4,5 баробардан зиёд 2 853 млрд.сўмдан 628 млрд.сўмгача камайган. Молиявий натижаларнинг кескин ёмонлашуви курс фарқидаги улкан йўқотишлар (1 193 млрд.сўмдан 4 217 млрд.сўмнгача) ва фоиз тўловларини ўз ичига оладиган молиявий харажатлар (2 694 млрд.сўмдан 4 430 млрд.сўмгача) потираб ошгани фонида юз берган. Бундай натижалар билан Ўзбекнефтегаз давлат қўллови мавжудлиги баҳонасида рейтингини сақлаб қоладими ёки пасайтириладими, яқин ойларда билиб оламиз.