​Бонкалар жамланиб қолган муаммоли кредитларни шу йилнинг ўзидаёқ тан олиши тўғри бўлади Fitch Ratings CIS+ давлатлари, хусусан Арманистон, Озарбойжон, Гуржистон, Украина, Қозоғистон ва Ўзбекистон банк секторлари бўйича 2026 йил кутилмаларига оид шарҳини эълон қилган. Ўзбекистон банк тизими тўғрисида тўхталиб, агентлик Ўзбекистон банкларининг молиявий кўрсаткичлари 2026 йилда барқарор бўлиб қолишини қайд этган. Айни пайтда асосий сценарийга кўра, муаммоли кредитларнинг янада ошиши кузатилади, бу эски хавфларнинг давом этаётган тан олиниши билан боғлиқ бўлиб, бу сектор даромадлилигига салбий таъсир кўрсатади. Fitch 2026 йилда сектор бўйича муаммоли кредитларнинг умумий кредитлардаги улуши 9–10% га етиб, максимумга чиқишини кутмоқда. Бу асосан давлат банкларидаги эски хавфларнинг давомли тан олиниши, шу билан бирга кредитларнинг “пишиб етилгани" туфайли чакана портфелларда ҳам зарарларнинг ошиши билан боғлиқ. Муаммоли кредитларнинг мезони бўйича Марказий банк ва халқаро рейтинг агентликлари ўлчовлари фарқланади. Fitch Ratings муаммоли кредит ўлароқ МҲХС бўйича қадрсизланиш даражаси 3- босқичга етиб келган кредитларни ("Stage 3 loans") тушунади. Бир муддат аввал, регулятор вакиллари тарафидан муаммоли кредитларни тан олишда шу мезонларга ўтиш ҳақида ҳам гапирилганди. Нима бўлгандаям, пандемиядан кейин яна авжига чиққан маъмурий кредитлаш ва банкларнинг нохос вазифаларга ундалиши, маҳаллабайдан тортиб тижорий бинолар қурилишигача турли бюрократик авантюраларда иштирок этишга мажбурлаш натижасида секторда муаммоли активлар етарлича жамланиб қолган. Ҳа, бонкалар чакана секторига ўлчовсиз ва тайёргарликсиз киргани, айниқса микроқарзлар бозорида фаоллашгани натижасида йиғилган муаммолар ҳам етарлича. Шундай экан, тан олишни кейинги йилга қолдириб ўтирмаслик тўғри бўлади ва инобатга олиш керакки, тан олиш натижасида пайдо бўладиган капитал етишмовчиликларни ва ликвидлик тешикларини давлат бонкалари ўзлари ёпиши керак (2026 йилда давлат бонкалари капиталига бюджетдан пул бериш мўлжалланмаган).