Ўзбекистонликлар метан йўқлиги учун пропанга ўта бошлашганди "Аҳолига бераётганимиз учун пропан қимматлаяпти" баҳона методичкаси ҳам биринчи марта ишлатилаётгани йўқ. Рақобат қўмитасининг оқлов изоҳларини дарров Энергетика вазирлиги илиб кетгани бежизга эмас. 2024 йил октябрда вазир Мирзамаҳмудов ҳам пропан нархидаги сакрашларни хусусан шундай изоҳлаганди. Лекин ҳеч ким савол бермайдики, нега 2022 йилгача бозор товари бўлган пропан билан бирданига сунъий дефицит ва қопланмаган талаб муаммолари пайдо бўла бошлади? Чунки 2022 йил охиридан метан заправкаларидаги узилишлар ва ёпилишлар юзминглаб истеъмолчиларни ўз автомобилларини пропан ускунаси билан қайта жиҳозлашга, яъни пропан ёқилғисига ўтишга мажбур қилди. Хўп, танловсиз қолган ва тинимсиз таланаётган ўзбек истеъмолчиси нима қилсин эди? Бензин АҚШдагидан қиммат, электромобиллар хусусий ва мокки импорти орқали сотиб олишнинг барча эркин танловлари қирқиб ташланган. Лекин 2024 йилдаги раллидан маълум бўлдики, автомобилини пропан ёқилғисига ўтказганлар ёмғирдан қутулиб, қорга тутилишди. Пропандан фойдаланувчилар каррасига ўсиши фонида пропан таклифи рағбатлантирилмади, қайтанга янада бўғилди. Вазиятдан унумли фойдаланиб қолувчи, турли кабинетлардаги маъмурий-бюрократик илдизлари ва шотирларидан озиқланувчи чўнтак корчалонларнинг куни туғди. Айнан талаб кескин ошадиган ойларда пропан ишлаб чиқарувчи йирик заводлар профилактикага ёпиладиган ҳолатлар одатга айланди. Рақобат қўмитасига ишонилса, пропанда юрувчи автомобиллар сони жами автомобилларнинг 11 фоизини ташкил этади (500 минг атрофида автомобиль), лекин пропан сотувлари жами ёқилғи сотувларининг 5 фоизигина пропан сотувларига тўғри келади. Бу рақамлар ҳеч нарсани англатмайди, чунки пропан ускунаси ўрнатганлар бир вақтнинг ўзида бензин қуйиши ҳам мумкин. Қолаверса минлаб энергожабрдийдалар автомобилларига ҳам пропан, ҳам метан ўрнатишган (буям мажбурликдан). Статқўм пропан ишлаб чиқарилиши ва импорти бўйича расмий статистикани умуман очиқламайди. Агар очиқлаганида 2022 йилдан буён пропан таклифи талабдан кўра қандай ортда қолаётгани тўғрисида тушунарлироқ ва ишончлироқ изоҳ бериш мумкин бўларди.