418 хатолик сабаби нима? Статистика қўмитаcи изоҳ берди Статистика қўмитасининг маълум қилишича, aҳолини онлайн рўйхатга олиш платформасининг расмий веб-сайти census.stat.uz’да онлайн рўйхатга олиш босқичи якунланганидан сўнг ахборот хавфсизлигини таъминлаш мақсадида қўшимча ҳимоя чоралари жорий этилган. Хусусан, 2026-йил 15–31-январь кунлари фаол ишлаган онлайн рўйхатга олиш платформасидан ушбу муддат тугагач, Ўзбекистон Республикаси ҳудудидан ташқарида фойдаланиш учун чекловлар ўрнатилган. Шу билан бирга, республика ичидаги айрим фойдаланувчиларда ҳам сайтга киришда вақтинчалик чекловлар ёки 418 туридаги техник хатоликлар кузатилиши мумкин. Онлайн шаклда ўтказилган рўйхатга олиш жараёни давомида тўпланган барча маълумотлар алоҳида серверда шифрланган ҳолда сақланмоқда. Шу муносабат билан, юртдошларимизнинг рўйхатга олиш билан боғлиқ маълумотларининг хавфсизлиги бўйича хавотирга ўрин йўқлиги таъкидланмоқдa. Маълумот учун, аҳоли ва қишлоқ хўжалигини рўйхатга олишнинг иккинчи босқичи 2026-йил 4–28-февраль кунлари давом эттирилади. Ушбу босқичда маҳалла еттилиги вакиллари хонадонма-хонадон юриб, маълумотларни планшет қурилмалари орқали тўғридан тўғри серверга киритиш ва юборишни амалга оширади.