Стартап лойиҳалари кўламлаштирилади Президент қарори билан 2030 йилга қадар 500 та стартап лойиҳани қиймати 1 миллион АҚШ долларидан юқори, 100 та стартап лойиҳани қиймати 10 миллион АҚШ долларидан юқори ҳамда 25 та стартап лойиҳани қиймати 100 миллион АҚШ долларидан юқори бўлган компанияларга айлантириш вазифаси қўйилмоқда. Солиқ ва муддати ўтган дебитор қарздорлиги мавжуд бўлмаган ҳамда солиқ хавфи паст бўлган Платформадаги муваффақиятли стартаплар реестридаги лойиҳаларга хорижий давлатларда корхоналар ташкил қилиш ва уларнинг устав фондини шакллантиришга (устав фондида иштирок этишга) ёки филиалларни айланма маблағлар билан тўлдиришга алоҳида қарорларсиз йилига 500 минг АҚШ долларигача маблағларни хорижий ҳисоб рақамларга ўтказишга рухсат берилади. Шунингдек, 2026 йил 1 апрелдан бошлаб “Рақамли стартаплар" дастурида иштирок этувчи стартап лойиҳаларга ІТ-парк резиденти мақоми берилади ҳамда уларга қонунчиликда белгиланган экспортнинг минимал кўрсаткичлари талабисиз тегишли имтиёз ва преференциялардан фойдаланишга рухсат этилади.