Депутатлар Йўламатолга ёрдам берадими? Йўламатол кўчаларини асфальтлаш лойиҳаси Open budget’да, афсуски, яна ютқазди. Лойиҳа тўплаган овозлар бўйича 10- ўринда қолди (Марҳаматга ажратилган пул энг кўп овоз олган 9та лойиҳага етди). Тўртинчи йилдирки, йўламатолликларга озгина - бир поғона ёки бир неча юз овоз етмай қолади. Туман бюджетининг қўшимча маблағлари ҳисобидан ажратилишини кутиш ҳам ўринсиз. Марҳамат бой туман эмас, катта ташрифлар ҳам чекка Марҳаматнинг чекка қишлоқларини четлаб ўтади. Бу йилдан бошлаб Олий Мажлис Қонунчилик палатаси депутатлари ғолиб бўлмаган лойиҳалар орасидан битта лойиҳани қўшимча ғолиб деб танлаши мумкин. Лекин ким, қайси депутат? Мен йўламатолликлар кимга ва қайси партияга овоз берганини билмайман, балки йўламатолликлар ўзлари ҳам билмас. Шу ўринда, 1990 йилдаги Ўзбекистон тарихидаги энг эркин демократик парламент сайловлар қандай ўтгани эсга тушади. Ўшанда бутун Йўламатол ҳали катта каттакон бўлмаган Қобилжон Обидов номзодига овоз берган. Жуда қизғин сайлов кампанияси пайтидаги учрашувларда йўламатолликлар Обидовдан эски мактабга ошхона ва янги мактаб қуриб беришда ёрдам сўраган. Обидов қуруқ ваъда бермаган, имконига қараб ҳаракат қилишини айтган, лекин кўп ўтмай, қишлоқда мактаб учун ошхона ва йўқчилик даврига қарамай, яп-янги мактаб ҳам қурилган. Янги мактабни энди вилоят ҳокими бўлиб кўтарилган Қобилжон Обидов шахсан ўзи келиб очган. Йўламатол болалари ҳалиям ўша 33 йил аввал депутат Обидов ёрдамида қурилган мактабга қатнашади.