​Айфон ва макбук сотиб олиш осонлашадими (арзонлашадими)? 2026 йил 1 июлдан бошлаб ҳуқуқий эксперимент тариқасида резидентлар ва норезидентлар томонидан жисмоний шахсларнинг шахсий эҳтиёжлари учун мўлжалланган товарларни махсус электрон савдо платформалари орқали чакана сотиш учун уларни вақтинча сақлашга мўлжалланган янги турдаги эркин омбор — бонд омборлари ташкил этишга рухсат этилади. Бонд омборлари орқали товарларни сотиш (бунинг учун лицензия керак бўлади) махсус электрон савдо платформалари реестрига киритилган платформалар орқали амалга оширилади. Эътиборлиси, бонд омборларидан қатор товарларни, хусусан, смартфон, планшет ва ноутбукларни жисмоний шахсларга сотишда божсиз олиб кириш нормалари тадбиқ этилмайди ва 5 фоиз миқдорида ягона божхона тўлови ундирилади. Ўзбекистонда 2 йил аввал антиижтимоий 2-3 қонуни амалга киритилиб, божсиз олиб кириш нормалари каррасига кесилгач, смартфонларни олиб кириш кескин қимматлашган ва мураккаблашган эди. Давлат раҳбарининг ўтган йили ноябрдаги фармонига кўра, шахсий эҳтиёж учун олиб кириладиган товарларнинг божсиз олиб кириш нормалари тўлиқ қайта кўриб чиқиш топшириғи берилган эди. Бонд омборлари орқали савдо лазейкаси мана шу топшириқ доирасидаги ечимми ё йўқ, тажриба ишга тушгач кўрамиз.