O’zshahar Qurilish Invest "ютган" аукцион бекор бўлдими? 2025 йил 16 декабрда Қурилиш вазирлигининг биносини сотиш бўйича ўтган аукционда O’zshahar Qurilish Invest 182,5 млрд.сўмлик таклиф билан ғолиб деб топилганди. Ўшанда саволлар аукцион жараёнига эмас, O’zshahar Qurilish Invest'нинг яширинча хусусийлаштириб юборилган давлат улушига нисбатан туғилганди (яширинча хусусийлаштирилган ва сопи ўзидан чиқариб совға қилинган ўнлаб улуш ва активлар бўйича ўзи алоҳида маҳкама очса бўлади). Spot'нинг ёзишича, орадан роса 4 ой ўтиб, Қурилиш вазирлигининг биноси яна сотувга қўйилмоқда, бу сафар 187,2 млрд.сўмлик бошланғич қиймат билан. Сотиладиган бино ва ер участкаси тавсифи ўзгармаган. Қизиғи, аввалги аукционда 4 нафар талабгор иштирок этган (шунинг учун бошланғич нарх 40%га кўтарилган) ва агар ғолиб ўз таклифидан воз кечган тақдирда ҳам, захира ғолиби билан битим тузилиши керак эди. 2025 йил 16 декабрда ўтган аукцион мақоми ҳозирда "сотилмади" қилиб ўзгартириб қўйилган. Ўзбекистонда аукционларни ғаройиб тарзда бекор қилиниши ва қайта ўтказилиши биринчи марта эмас. Тошкентда 1,5 йил аввал парковка ҳуқуқи учун ўтган шармандали аукцион мана шундай тарихлардан бири.