Антикоррупция агентлиги "парковка иши"ни очадими? Келинг, парковка қиролини ясашда қанақа ғаройиб ва шармандали ишлар бўлганини бир эслайлик. 2024 йил 13 ноябрь куни Тошкент шаҳрининг энг асосий 50дан ортиқ кўчасидаги 86та участкада пулли тўхташ жойларини бошқариш ҳуқуқи учун аукцион эълон қилинди. Пойтахтнинг энг гавжум ва ликвидли кўчалари битта лотда аукционга қўйилди, ваҳоланки бўлажак парковкалар ўнлаб лотларга бўлиниши ва улар бир неча аукционларда ўзаро боғланмаган инвесторларга таклиф этилиши орқали ҳам рақобат таъминланиши, ҳам аукциондан бюджетга ўнлаб карра кўпроқ маблағ туширилиши мумкин эди. Лекин бундай қилинмади? Нега? 2024 йил 25 ноябрь куни пулли «парковка»ларни ташкил этиш бўйича аукционда Balcomuz компанияси 120,15 млрд сўм таклиф билан ғолиб чиқди. Агар ғолиб шартнома тузишдан воз кечса, айнан захира ғолиб билан шартнома тузилиши керак. Balcomuz икки соатдан кўпроқ вақт мобайнида кимлар билан рақобатлашди ўзи, бир ўзи ёки сохта талабгорлар қатнашмагандирки, 22 марта нарх ошиб борди? Акционнинг захира ғолиб номи эса очиқланмади. Нега? 2024 йил 13 ноябрь куни, яъни пулли парковка аукциони эълон қилинган куни Streetpark Systems деган компания давлат рўйхатига олинди. Бу компания номини яхшилаб эслаб қолинг, чунки у кейинги қаҳрамонга айланади. Антикоррупция агентлиги ҳам эслаб қолсин! 2024 йил 17 декабрь куни тўсатдан пулли парковкалар учун кимошди савдоси қайтадан ўтказилди. 20 дақиқа ичида аукцион тугади ва 62,93 млрд.сўм таклиф этган Streetpark Systems ғолиб деб эълон қилинди. Нима учун икки карра кўп пул таклиф этган Balcomuz шартнома тузишдан бош тортгани (кимлар ва қандай йўл билан уни бунга мажбур қилгани), нега захира ғолиб билан шартнома тузилмагани (ёки захира ғолиб қандай қилиб ўйиндан чиқарилгани) ҳақида бирон очиқ ахборот эълон қилинмади. Такрорий аукционда Streetpark Systems билан яна кимлар талабгор бўлгани, Streetpark Systems илк аукционда иштирок этгани ёки этмагани номаълумлигича қолди. Нега? 2024 йил 14 декабрь куни “Пулли тўхташ жойлари” дастурини яратиш учун тендер эълон қилинган, натижалар 20 декабрда очиқланган. Тендерда 6,78 миллиард сўм таклиф қилган ва катта эҳтимол билан тажриба портфели тугул, ҳали биронта дастур яратмаган Streetpark Systems МЧЖ ғолиб деб эълон қилган. Ташкилотчилар тендер ўтаётган кунлари Streetpark Systems'га пулли парковка парковка ташкил этиш ҳуқуқи топширилганини билишган, парковка учун ҳам дастур, ҳам ҳуқуқнинг бир қўлда жамланиши қанақа монопол оқибатлар яратишини ҳам, шунга қарамай, Streetpark Systems МЧЖ ғолиблиги расмийлаштирилган. Нега? Энг қизиғи, шу бузуқ ва пировардида товонини ўзбекистонликлар тўлайдиган жараёнларнинг ҳаммасига, нима бўлаётгани кўра била, тушуна туриб, Иқтисодиёт ва молия вазирлигидан тортиб Рақобат қўмитасигача органлар сукут билан кузатишда давом этишган ва давом этишмоқда. Нега? Нормал давлатда ўтган йили 13 ноябрдан бошланган парковка қиролини ясаш бўйича юз берган ва бераётган ғаройиб ва шармандали ишларга нисбатан аллақачон коррупцион иш очилган бўларди. Нега Ўзбекистонда очилмайди? Агар ҳатто шу ишларга нисбатан Антикоррупция органи бефарқ ва беэътибор бўлса, бу агентликнинг Ўзбекистонга нима кераги бор ўзи? Фақат фасад учунми?