Давактив O’zshahar Qurilish Invest'ни ҳам яширинча "хусусийлаштирганмиди"? Қанчага? Ажойиб замонда яшаяпмиз, қанчалик ўрага сичқон тушди, гулдур гуп қилишмасин, бир ахборот бошқа яшириб келинган ахборотни очиб қўяди. O’zshahar Qurilish Invest Қурилиш вазирлиги биносини 182,5 млрд.сўмга сотиб олгани ҳақидаги аукцион хабар аввалига ғалати туюлди, бир давлат ташкилоти бошқа давлат ташкилоти мулкини одатда сотиб олмасди (балансдан балансга ўтказиларди). Лекин Spot'нинг очиқ манбаларга таяниб ёзишича, O’zshahar Qurilish Invest МЧЖ 100% таъсисчиси Нуриддин Қодиров. 2017 йилда Республика шаҳарларида арзон кўп квартирали уйларни қуриш ва реконструкция қилиш борасидаги тадбирларни ўз вақтида ва сифатли амалга ошириш мақсадида O’zshahar Qurilish Invest МЧЖ 100% давлат улушида асосида ташкил этилган (Тикланиш ва тараққиёт жамғармаси 61%, Ўзметкомбинат, Кизилқумцемент, Ўзбекинвест 10%дан, Ипотека-банк 9%). 2022 йилда O’zshahar Qurilish Invest МЧЖ 90% улуши Давактивга ўтказилган (Бу пайтга келиб Қизилқумцемент "хусусийлашиб" кетганди, шунинг учун унинг улушига тегишмаган). Ўша пайтда O’zshahar Qurilish Invest МЧЖ энг кўп фойда олаётган топ давлат корхоналари рўйхатига кирган (ўз капиталидан 50 карра кўп фойда олган). Биз биламизки, Давактив қўлига ўтганки улушлар эгасини топмай қолмайди. Бир йил ўтиб, 2023 йил мартида Давактив назоратидаги O’zshahar Qurilish Invest МЧЖ 90% улуши оммавий савдоларга чиқарилган. Лекин шу кунгача, ўтган 2 йил 9 ой давомида Давактив O’zshahar Qurilish Invest МЧЖ улушларининг савдога чиқаргани, кимлар ошхўр консультант бўлгани, кимлар спарринг талабгорлик қилгани ҳақида ахборот очиқламаган. Бошқа ўнлаб йирик активлар қаторида енг остида, балки яширин протокол ва ёпиқ қарорлар билан, балки яна сопини ўзидан чиқариб. Буни энди яна тутқич бермас "хусусийлаштириш оталаридан" сўраш керак.