Энди дизель ёқилғиси ҳам субсидияланади Ҳужжатга кўра, 2026 йил 1 апрелдан 2026 йил 1 июлгача қишлоқ хўжалиги корхоналари томонидан биржа орқали харид қилинган ҳар бир тонна дизель ёқилғиси қийматининг 13 млн сўмдан ошган қисми учун, бироқ 2 млн сўмдан кўп бўлмаган миқдорда республика бюджети ҳисобидан субсидия ажратилади. Қизиқ тарафи, айнан апрель ойи бошида дизелнинг тоннаси бирданига ўртача 2 млн.сўмга қимматлаганди ва шундан бери пасаймай, юқорилигича қолмоқда. Субсидиялашни ваъда қилинганидек қисқартириш ўрнига яна турли важ-корсонлар билан кўпайтириш бошлангани ачинарли. Рақобатли бозор йўқлиги шароитида дизелни субсидиялаш фермерлар фойдасига эмас, таклифни назорат қилаётган монополист ишлаб чиқарувчилар ва импортчи олигархия чўнтагини тўлдириш дегани бўлади. Хўп, ҳозирча бюджетда пул бор экан (қиммат олтин ва қарз олиш имконияти), субсидиялашга имкон бор. Пул камайса, нима бўлади? Очилган субсидия каналини қайта ёпишга ислоҳотчиларнинг хоҳиши ва имконияти бўладими? Қизиқ тарафи, дизелга субсидия ажратиш 2026 йил бюджетига умуман киритилмаган. Парламентимиз декабрга бориб, ишлатиб бўлинган субсидияни тасдиқлаб берса керак. Газга субсидия, электрга субсидия, пропанга субсидия ва энди дизелга (ҳали бюджетга киритилмаган). Биз бозорга ўтмоқчимизми ўзи?