Ҳар кузда, ҳар баҳорда — Ўзбекистонда фермерларни монополистлар ва олигархлар томонидан талаш мавсуми Биржа савдоларида охирги бир ойда (7 августдан 7 сентябргача) дизель ёқилғиси ўртача нархи 16 335,7 минг сўмдан 18 730,9 мингсўмгача, 14,7%гача кўтарилган. Ўтган 1 йилда эса дизель ўртача нархи оз эмас, кўп эмас, нақ 55%га қимматлаган. Тасаввур қилишингиз учун, роса 1 йил аввал дизель ёқилғиси тоннаси ўртача 12 065,2 минг сўмдан сотилган. Қип-қизил спекуляциялар марказига айланган биржа ўртача нархлар қандай потираб ошаётганини кўрсатмаслик учун дизель маҳсулотларини атайин турли типларга ажратиб юборган, бу билан гўёки эътиборни чалғитган (чунки қайта ҳисоблаш ёки кузатиш вақт олади). Очофат монополистлар ва улар билан тили ва кети чатишиб кетган ўғри олигархия ҳар қандай баҳона бўлган пайти дизель нархини кўтаришиб олишади. Бу аждарҳоларнинг тил бириктиришини исботлаш шарт эмас — айниқса бечора фермерларга дизель ёқилғиис керак бўладиган баҳорда экин ва кузги йиғин пайтидаги нархларга қаралса кифоя. 1 апрелдан 1 июлгача Субсидиялаш даври эълон қилинганиям фермерларнинг фойдасига эмас, зиёнига хизмат қилди. Қайтанга субсидиялаш баҳона яна бир бор нархлар ошириб олинди. Дизель нархини ошаётганига ташқи омилларни важ келтирилиши худди *сироққа арпа уни баҳона бўлгани каби. Эътибор беринг, биржада айнан маҳаллий ишлаб чиқарувчиларнинг маҳсулотлари потираб ошмоқда (худди 92 шиптир нархи ошаётгани сингари). Масалан, космосдан кўринадиган коррупцион объектга айланган, 4 млрд.долларгача қимматлаштирилган GTL заводнинг маҳсулоти — GTL-A 70-L S K-6 дизели ўтган 1 ойда 16 670,7 минг сўмдан 18 445,9 минг сўмгача, 10,6%га қимматлаган. Бу завод дизель арзон ва имконли бўлади, деб қурилгнамиди ё бечора фермерларни талаш воситасига айланиши учун? Худди шунингдек, маҳаллий монополист маҳсулоти — EKO тоифасидаги дизель 16 382,3 минг сўмдан 19 081,7 минг сўмгача, 16,5%га қимматлаган. Яъни, фермерларни ва уларнинг ортидан бошқа истеъмолчиларни ҳам қанақадир мохов босқинчилар эмас, ўзимизнинг монополистлар ва олигархлар таламоқда. Хўп, жаноб амалдорлар, 1,5 карра қимматлаштирилган дизель ишлатаётган фермер нима қилиши керак? Маҳсулоти нархини ошириши керакми? Пахта ва ғалланинг нархини ошира олмайди. Ё сизлар истаётгандек, қўлини силтаб, ерини топшириб кетиши керакми? Оёғи ва қўли боғлиқ антимонополиядан ёки жонсарак парламентдан қанақадир овоз чиқишини кутиш доимигидек мушкул масала. 2,5 йил аввал, дизель нархлари осмонга ўрлаган пайтда Давлат раҳбари шахсан ўзи вазиятга аралашиб, нархларни тийиш ва пасайтириш тўғрисида топшириқ берган эди. Бу сафар ҳам бундан бошқа чора қолмаган кўринади.