Лойиҳага ким инвестор, ким буюртмачи, молиялаштириш манбаси қаер, қурилиш қачон битади – жавоб йўқ! Кунўз ўтган йили бузиб юборилган Юнусобод бозори ўрнида улкан қаровсиз ҳудуд пайдо бўлганига эътибор қаратиб, шаҳар ҳокимлигини саволга тутган. Давлат капиталига берган пул ҳисобига бино қуриб, сотувчига айланган ҳалол-пок бонкирлар олдиган қўйилган вазифалар ва кўз-кўз қилинган презентацияларга кўра, Юнусободда аллақачон 8 қаватли бозор пайдо бўлиши керак эди. Лекин 8 қаватли бозор қачон битиши тугул, бозорга 40 миллион доллар сармоя киритиши керак бўлган "хорижий инвестор" номиям номаълум. 2 500 иш ўрни яратиш таклифи презентациягача қўрқмай, 4 000 - 5 000 гача ошиб кетганидан билса бўладики, "инвестор" кичик одам бўлмаган. Қанийди, бузиб ташланган ва ҳувиллаб ётган лойиҳалар фақат Юнусобод бозори билан тугаса. У ёқда 2,5 йил аввал жамоатчиликнинг ҳай-ҳайига қарамай, бузиб ташланган ва янтоқзорга айланган "Бухоро туризм маркази" турипти. Сингапурликми, кипрликми ё гонконглик инвестор ҳозир қаерда ўзи? Ўзбекистондами? Инвесторнинг ҳеч қанақа инвестор эмаслигини ҳамма биларди (келиннинг ҳалигинақа эканлигини ҳамма биларди, ушлаб олганимиз чатоқ бўлди-да). Бузиб ташланган стадион ўрнига бузармон ҳокимтўра ваъда қилган янги 25 минглик стадион-чи? Лойиҳа ясаш ва пўрим презентацияларда кўз-кўз қилиш майли, буни энди тўхтатиб бўлмайди, номенклатуранинг социал лифти фақат шу орқали ҳаракатланадиган бўлиб қолган. Балки энди, орадан шунча йиллар ўтиб (янги даврнинг 10- йилига келиб), ясалган лойиҳалар бўйича ижро, ҳисобот ва ҳисобдорликни ҳам йўлга қўйиш керакдир? Балки энди ҳар галги катта ташриф аввалги ташрифдаги ваъдалар, лойиҳалар ва муддатлар бўйича сўровдан бошланиши лозимдир?