Қарз йиғиш билан боғлиқ вазият ҳам оғирлашмоқда Сенат Президент қароридан келиб чиқиб, кредит ва микроқарзлар рекламасида молиявий таваккалчиликлар ҳақида мажбурий огоҳлантиришларни қонунчиликка киритиш масаласини муҳокама қилган (2:01:00 дан кўриш мумкин). Ўтган куни Марказий банк ҳам тегишли ўзгартиришлар қонуности ҳужжатларига киритиш бўйича лойиҳани муҳокамага қўйганди. Қонун муҳокамаси пайтида таклиф этилаётган реклама чекловлари ошиб бораётган қарз юкини қанчалик тийиб туриши мумкинлиги бўйича саволлар янграган. Марказий банк раиси ўринбосари Санжар Носиров аҳоли қарз юкининг ортиб бораётганини ташвишли ҳолат деб атаб, хатарлар кредитлашнинг ўзида эмас, балки фуқароларнинг қарзларни узиш қобилиятида эканини таъкидлаган. Шу ўринда, муаммонинг яна бир учи кредит ва қарз йиғиш билан вазиятнинг оғирлашаётганига ҳам тақалишини айтиб кетмаса бўлмайди. Аҳолига оид мажбуриятларни йиғиш банкларга ҳам, микромолия ташкилотларига ҳам борган сари қийинлашиб, қимматлашиб бормоқда. Мажбуриятларни сўндиришнинг юмшоқ таъсир чоралари 9 миллиондан ошган қарздорлар билан ишлашда етарли бўлаётгани йўқ. Қарз ундиришнинг қаттиқ воситаларини жорий қилиш ва тегишли институтлар фаолиятига рухсат берилиши пайти ҳам келган. Олинган кредит ва қарзларни (нафақат банклардан, фуқаролардан ҳам) қайтармасликни анъанага ва ҳатто яшаш тарзига айлантирган энг ёмон қарздорларга нисбатан хизматлар кўрсатиш ва ҳаракатланишга оид ижтимоий ва маиший чекловларни киритиш масаласи ҳам кун тартибига чиқиши керак.