Мустақилликнинг 25 йиллиги конлари Ўзбекнефтегаз назоратига қайтадими? Икки йил аввал авария рўй берган Бойсундаги Мустақилликнинг 25 йиллиги конида қудуқни ёпиш ишларига Хитойнинг CNPC компанияси жалб этилган. Маълум қилинишича, газ сизиб чиқиши давом этаётган қудуқлар келаси йил июлгача ёпилади. Хитой компанияси билан тузилган келишувнинг бошқа муҳим, хусусан молиявий тафсилотлари доимгидек очиқланмаган. Қудуқни ёпиш қанчага тушганини балки қудуқ ёпилгач, айтишар. Шу ўринда яна савол туғилади. Конни ўзлаштириш бўйича Консорциумда Ўзбекнефтегаз улуши 20% холос, яъни кичик ҳамкор. Қолган 80%и кипрлик (Altmax Holding) ва швейцариялик (Gas Project Development Central Asia) "инвестор"лар назоратида. Бойсундаги авариядан кейин бирон марта бу "инвестор"ларнинг юзини биров кўрмади, сўзини биров эшитмади. Аварияни ёпишга уринаётган ҳам ўзбек томони ва Ўзбекнефтегаз, америкалик, хитойлик компаниялар билан музокараларга киришаётган ҳам ўзбек томони ва Ўзбекнефтегаз. Харажатлар ҳам, катта эҳтимол, Ўзбекнефтегазга осилмоқда. Шундай экан, «Мустақилликнинг 25 йиллиги» кони бўйича лойиҳани, агар унинг истиқболига ростанам ишонилаётган бўлинса, тўлиқ Ўзбекнефтегаз назоратига ўтказиш пайти келмадими?