​Кичик ва микро ГЭСлардан электр энергияси қимматроқ нархда сотиб олинади 5 МВтгача бўлган кичик ва микро ГЭСларни қуриш бўйича лойиҳа ташаббускорларини аниқлаш мақсадида Энергетика вазирлиги буюртмаси асосида “E-auksion” электрон савдо майдончасида ишлаб чиқарилган электр энергиясини сотиб олиш тарифини пасайтириб бориш юзасидан ўтказиладиган электрон аукционда бошланғич нарх билан биргаликда энг қуйи нархни ҳам белгилаш тартиби жорий этилмоқда.   Бунда нархлар II гуруҳ истеъмолчилари учун белгиланган тарифга (кВт.соати 1 100 сўм) нисбатан қуйидагича ўрнатилади:   қуввати 500 кВтгача бўлган микро ГЭСларга – бошланғич нархи 150 фоиз (1 650 сўм), энг қуйи нархи 50 фоиз (550 сўм) миқдорида;   қуввати 500 кВтдан 2 МВтгача бўлган кичик ГЭСларга – бошланғич нархи 120 фоиз (1 320 сўм), энг қуйи нархи 40 фоиз миқдорида (440 сўм);   қуввати 2 МВтдан 5 МВтгача бўлган кичик ГЭСларга – бошланғич нархи 100 фоиз (1 100 сўм), энг қуйи нархи 30 фоиз (330 сўм) миқдорида. Яъни, бошқача айтганда, янги кичик ва микро ГЭСлар қурилишига тадбиркорларни жалб қилиш учун тизим қиммат тарифлар билан рағбатлантирилади ва молиялаштирилади. Айни пайтда, мазкур қоидалар фақат 2030 йилгача амал қиладими ёки доимийгами, аниқлик киритилмаган (кичик қуёш станциялари ташкил этган тадбиркорлар мисолида бўлгани сингари каби эртага тарифларни пасайтириш ё нотўловлар билан боғлиқ саволлар туғилмайдими?).