​Минтақавий инвестиция форумлари ўтказиш навбати Андижонга етибди. Аввалбошдан айтаман - форумнинг номи жуда ёқди: Очиқ Андижон Лекин мундарижасига кўра, шартли Давос форумидан кўра шартли Петербург форумини эслатади. Ташкилотчи давлат, иштирокчилар эса асосан чиновниклар ва давлат, давлат назорати, давлат шафъелигидаги субъектлар. Истиқболда Орзудаги Ўзбекистонда бундай форумлар табиий, давлат иштирокисиз, бизнес одамларининг умумий платформасига айланиши керак албатта. Унгача эса ички ва ташқи инвесторларда ишонч яратиш учун форумсиз ҳам Андижонда қилинадиган ишлар жуда кўп. Энг аввало ҳаво инфраструктураси - аэропорт тикланиши керак. Андижон аэропорти очиқ тендерларда, орқа эшикларда қабул қилинадиган қарорларсиз лоукостерларга берилиши керак. Кейин Қирғизистон билан чегара пунктлари кўпайтирилиши зарур. Товар сотиш учун ҳам, товар олиш учун ҳам Андижон учун асосий вектор Қирғизистон жануби. Учинчидан, вилоятда иқтисодиётнинг асосини ташкил этувчи автосаноат корхоналари хусусийлаштирилиши зарур, албатта, ёпиқ қарорлар ва ишончли бошқарувга бериш орқали эмас. Бу соҳанинг кейинги ривожига, рақобат муҳитига катта стимул беради. Тўртинчидан, вилоят бошқарувига вилоят аҳолисининг ақлий салоҳиятига мос интеллектуал менежмент керак, лаббайчи ва зарарли популистлар эмас. Бу ишга ҳокимларни сайловлар орқали сайлаш билангина эришилади. Ана кейин Андижон ростанам Очиқ Андижонга айланади