2021 йил кутилмалари. Валюта, пул нархи ва жамғармалар Аксарият йирик банклар ва инвесткомпаниялар келаси йил учун олтин нархининг барқарор сақланиши ва вақти-вақти билан спекулятив ўсишлар юз беришини прогноз қилмоқда. 2020 йилда учта энг йирик регулятор ФРТ, Европа Марказий банки ва Япония банки 8 триллион доллардан ортиқ миқдорий юмшатишларни (халқ тилида айтганда шунча пул босиб муомалага чиқарилган) амалга оширган. Солиштириш учун 2009-2019 йиллар давомида амалга оширилган миқдорий юмшатишлар ҳажмининг абсолют ўсиши шунчани ташкил этган. Демак олтин нархининг рағбати учун пул омиллари етарли. Шу маънода 2021 йил ўзбек сўми учун нисбатан барқарор йил бўлишини тахмин этиш мумкин. Лекин асосий савдо ҳамкорлари валюталарининг нисбатан тезроқ қадрсизланаётгани муҳим омил бўлиб қолади. Ўтган йил якунида ёзганимиздек, рубль, тенге, сомоний, сом ва турк лираси тезроқ қадрсизланаётгани сўмга ўз таъсирини кўрсатмай қолмайди. Инфляция бўйича таргет 10% деб белгиланганидан келиб чиқилса, долларнинг сўмга нисбати 2021 йил охирига 11 500 сўмгача етиб боришини кутиш мумкин. 2021 йил учун давлат бюджети даромадларини ҳисоблашда ўртача йиллик курс 11 000 сўм этиб олинган. Инфляцион таргет ва бозордаги пул нархини пасайтириш тадбирларидан келиб чиқилса, Асосий ставкани камида икки марта: аввал биринчи ярим йилликда 13 фоизгача, йил охирига келиб эса 12 фоизгача туширилиши мумкинлигини инобатга олиш зарур бўлади. Валютада жамғариш ва валютада кредитлаш нисбий афзалликларига қарши кураш давом этади. Мажбуриятларни валютада аккумуляциялаш банкларга ҳам, бизнесга ҳам "невыгодно" бўладиган чоралар кўрилади. Мақбул фоиз сиёсати муддати узайтирилмагани ортидан январь ойидан депозитлар бўйича фоиз ставкаларининг бироз ошиши қайд этилиши мумкин. Лекин депозитлар бўйича фоизлар ошишини кредитлар бўйича фоизларнинг оширилиши риск шкала ва капитал билан тийиб турилиши чеклаб қолади. Соддароқ айтганда, банклар ўзлари қаттиқ хоҳлаганда ҳам кредитлар бўйича фоизларни ошириб юбора олмайдилар, қўллари боғлиқ. Депозитлар бўйича фоизларни ҳам ҳаддан зиёд ошириб юбора олмайди, чунки банк фойдаси (маржиналлик) қисқариб кетади. Жамғармага эга фуқаролар учун январь-февраль ойларидаги депозит таклифлари энг жозибадор бўлиб қолади. Кейин эса йил давомида фоизларнинг фақат тушиб боришини кузатиб қолиш мумкин бўлади. Банк омонатларининг энг асосий рақобатчиси уй-жой сотиб олиш таклифлари бўлади. Уй-жой нархларининг ҳар ойда 1%дан юқори ўсиш тенденциясига қайтиши эҳтимоли юқори, бу эса омонатларнинг, айниқса фоизлари пасайишда давом этадиган валютадаги омонатларнинг уй-жой секторига оқиб кетишини таъминлайди. @the_bankiroff