Приоритетларни Парламент белгилаши лозим
Ўтган куни биринчи навбатда ва бепул эмланиши лозим бўлган аҳоли тоифалари эълон қилинди. Улар жами 4 млн 112 минг 668 нафар:
65 ёш ва ундан юқори ёшли кексалар,
тиббиёт ходимлари, сурункали касалликка чалинганлар,
ўқитувчилар,
мактабгача таълим муассасаси ходимлари, қуролли кучлар ва ҳуқуқни муҳофаза қилувчи органлар ходимлари.
Бугун Коронавирусга қарши курашиш штаби биринчи навбатда коронавирусга қарши бепул вакцина олувчилар рўйхати кенгайганини ва рўйхатга журналистлар, блогерлар, ОАВ ходимлари, жамоат транспорти ходимлари, чет давлатларда таҳсил олувчи талабалар, меҳнат мигрантлари киритилганини эълон қилмоқда.
Бу кетишда худди Тошкент пропискаси оладиган рўйхати каби приоритетдагиларнинг рўйхати ўзгариб бораверади.
Шу ўринда савол туғилади:
Ким Коронавирусга қарши курашиш штабига бу ваколатни берди? Уларни кимдир сайлаганми? Ваколат берганми? Кимдан мандат олган улар? Шахсан мен қанақадир ёпиқ штаб эмланадиганлар рўйхатини белгиланишига қаршиман. Олдиан ҳам кўп айтилган фикрни яна қайтараман: Нафақат штаб, ўша махсус комиссиянинг легитимлиги савол остида.
Иккинчидан, агар бепул эмлаш амалга ошириладиган бўлса, барча Ўзбекистонликлар бепул эмланиши лозим. Албатта бунда приоритетни ва кетма-кетликни Парламент, гарчи унинг эркин сайловларда шаклланмагани ва мустақил эмаслиги борасида эътирозлар бўлсада, белгилаши лозим. Қанақадир штаб эмас.
Учинчидан, агар ўзбекистонликларнинг фақат маълум тоифасигина бепул эмланиши йўлидан юрилса вакцинациядан кутилаётган эффектни ҳавога совуришимиз мумкинлигини эсдан чиқармаслигимиз лозим. Қамров жуда кичик бўлади, демакки натижа ва кутилган самара юз бермайди. Ўзбекистонликларнинг ўзининг ментал, эътиқод, даромад, қадрият ўлчовларидан келиб чиқиб, ўз ҳисобидан ва ихтиёрий эмланишини ва бу катта кўламда юз бериши мумкинлигини сиз тасаввур этасизми? Мен тасаввур эта олмайман.
P.S. Блогерлар бепул эмланмаслиги лозим.
Блогерлар қачон бепул эмланиши мумкин, қачонки барча ўзбекистонликлар бепул эмлансагина, ундаям фақат олд рўйхатда эмас.
@the_bankiroff