Жамоат эҳтиёжлари учун ер участкаларини олиб қўйиш қонун билан тартибга солинади Мулк ҳуқуқи қуш ҳуқуқига айлантирилган Ўзбекистонда ҳеч бир фуқаро яшаб турган уйи ёки дўкони, цехи ёки фабрикаси жойлашган ер участкалари тортиб олинишидан ҳимояланмаган. Маълум-у машҳур ибора - "Жамоат эҳтиёжлари учун" дейилади, бўлди. Жамоат эҳтиёжлари амалда бир гуруҳ ўғри ва муттаҳамларнинг бойлик орттириш режалари доирасида бўлса ҳам. "Ер участкаларини компенсация эвазига жамоат эҳтиёжлари учун олиб қўйиш тартиб-таомиллари тўғрисида"ги Қонунни қабул қилиш билан шу кунгача амал қилиб келган бошбошдоқлик ва ўзбилармонликни тартибга солиш мўлжалланган. Бу сафар Қонунда Ер участкаларини компенсация эвазига жамоат эҳтиёжлари учун олиб қўйишга асос бўладиган ҳолатлар аниқ кўрсатилган ва олтита хатбошида санаб чиқилган. Менинг фикримча, мудофаа ва давлат хавфсизлиги, Ўзбекистон Республикасининг халқаро шартномаларидан келиб чиқадиган мажбуриятларни бажариш мақсадларидагина ер участкаларини олиб қўйиш тўғри бўлади. Лойиҳада санаб ўтилган қолган ҳолатларда, истаймизми ёки йўқми, соф тижорий мақсадлар ястаниб ётипти. Масалан, мен махсус иқтисодий зоналарни ташкил қилишни Жамоат мақсадлари дейишга тилим бормайди. Шунингдек, ер участкаси олиб қўйилгани учун компенсация келишувда кўрсатилган муддатларда, бироқ келишув тузилган кундан эътиборан олти ойдан кўп бўлмаган муддатда берилиши қайд этилган. Олти ой жуда кўп муддат. Икки хонали инфляция шароитида бу жуда катта ютқизиқ. Компенсация тўлаш муддати бир ойдан ошмаслиги керак. Дарвоқе, шу ўринда бир орзу-ниятни айтиб кетмасам бўлмайди. Худди 1991-1992 йилда хонадонлар эгаларига приватизация қилиб берилганидек, турар-жойлар турган ер майдонлари ҳам эгаларига бепул хусусийлаштирилиб берилиши керак. Бу жуда катта иқтисодий эффект беради. Қолаверса, Ер участкаларини олиб қўйилиши масаласи ўз-ўзидан кун тартибидан тушади. Аҳоли яшаётган уй-жой ер майдони керакми? Марҳамат қилиб, нархини келиш, рози қилиб, келиш ва сотиб ол. Бутун маданиятли дунёда шундай принцип ва механизмлар. Лекин бунгача ҳали кўп қовун пишиғи борга ўхшайди. Шунинг учун лойиҳа билан танишинг ва фикр-мулоҳазаларингизни албатта билдиринг