Кредит фоизларини қоплаб бериш кўлами расман кенгайтирилди Бундан 2 ҳафта муқаддам тадбиркорлик субъектларининг кредитлари бўйича фоизларни қоплаб бериш кўламини кенгайтириш бўйича таклиф берилганди. Кеча қабул қилинган "Тадбиркорликни қўллаб-қувватлаш тизимини такомиллаштириш, ишбилармонлик муҳитини янада яхшилаш бўйича қўшимча чора-тадбирлар тўғрисида"ги қарор доирасида Тадбиркорлик фаолиятини қўллаб-қувватлаш давлат жамғармаси томонидан: Марказий банк асосий ставкасининг 1,75 бараваридан ошмаган миқдордаги фоиз ставкаси билан кичик тадбиркорлик субъектларига миллий валютада бериладиган кредитлар бўйича фоиз харажатларини қоплаш учун компенсация, унинг белгиланган миқдорларини сақлаб қолган ҳолда, тақдим этилади. Демак, агар масалан, бугун Асосий ставка ўзгармай қоладиган бўлса, компенсация 1 майдан бошлаб 24,5%гача бўлган миллий валютадаги кредитларга 5 % бандгача миқдорда компенсация қоплаб берилади. Демак, энди юқори фоизли кредитлар ҳисобига молиялаширилган лойиҳалар бўйича ҳам компенсация олиш мумкин. Ҳозирда бизнесга ажратилаётган кредитларнинг ставкалари 20-25% коридорида, демак компенсация механизми миллий валютада ажратилаётган деярли барча кредитларни қамраб олиши мумкин. Рискини оширмаслик ниятида бўлган банклар ҳам фоизларни шу коридорда ушлашга ҳаракат қилади.