Улкан Кутубхона қиймати мавжудми? Уни ким қуради? Лойиҳасини ким тузган? Аввал бир неча миллиард сўмга таъмирлаб, кейин бузиб юборилган Наврўз қабуллар уйи ўрнида бунёд этилиши кўзда тутилаётган Улкан Кутубхона презентация қилинди. Ташқи кўриниши Аркадаг ва Раҳмон даври архитектурасини эслатадиган ушбу бинонинг қурилиш қиймати ҳали очиқланмаган. Шу ўринда табиийки бир неча саволлар туғилади? Улкан Кутубхонага зарурият ижтимоий, иқтисодий муаммоларимиз қалашиб ётган ҳозирги мураккаб даврда ва яқиндагина қурилган Миллий кутубхонамиз мавжудлигида кечиктириб бўлмас приоритетмиди? Масалан, унинг ўрнига 2, 3 сменада ўқишга мажбур бўлинаётган Тошкентда 20та, балки 50 та мактаб қуришимиз ўринлироқ эмасмиди? Бинонинг лойиҳасини ким тузган? Лойиҳа бўйича танлов ўтказилганми? Қурилиш ишларини ким олиб боради? Тендер ташкил этиладими? Ё тендер ўтказмасдан ғолиб аниқлаб бўлинганми? Ким экан у? Лойиҳанинг тасдиқланган қиймати мавжудми? Ё пудратчи ва лойиҳачиларнинг иштаҳаларига қараб 2, 3 карра ошиб бораверадими? Қурилиш ишлари лойиҳалаш билан параллел олиб бориладими? Дарвоқе, яна бир бор эслатиб ўтишга тўғри келади, амалдаги қонунчиликка кўра: Объектларни параллел лойиҳалаштирган ҳолда қуриш фақат мамлакат Мудофаа қобилиятини ва хавфсизлигини таъминлашга доир чора-тадбирлар, табиий ва экологик офатлар оқибатларини бартараф этиш, Ўзбекистон Республикасининг халқаро мажбуриятларни бажариши ва бошқа кечиктириб бўлмайдиган давлат эҳтиёжларини ҳал этиш билан боғлиқ истисно ҳоллардагина мумкин.